Manipur-ah ni 5 chhung mobile internet titawp

Manipur-a tualchhung buaina chhuak avangin Inrinni zan aṭang khan ni nga chhung atan mobile internet tihtawp a ni.

All Tribal Student Union Manipur (ATSUM)-in Zirtawpnia hill district-a national highway dang a, valley region tana mamawh phurh luh turte an dan chah avangin buaina hi a chhuak ṭan a ni. ATSUM hian Manipur Legislative Assembly neih mekah Manipur (Hill Areas) Autonomous District Council (Amendment) Bill 2021 pharh an phut a, an thil phut nawrna atan kawngpui hi an dang a ni.

ATSUM-in kawngpui an dan avanga lungawi loin, Valley region-a Meitei Leepun pawl chuan Imphal-a ATSUM office chu an kharsak a ni. Meitei Leepun chuan kawngpui dan hi valley area-a chengte bik an bitumna niin an puh.

Inrinni tlai khan Phougakchao Ikhang-ah mi ṭhenkathin motor an hal a, hemi hnu hian tualchhungah buaina hi a chhuak zui a ni.

Special Secretary (Home) H Gyan Prakash chuan Inrinni khan thupek tichhuak nghalin, social media chu buaina chawh chhuahna te, inhuatna thu thehdarhna atana ṭha lo taka hman a nih avangin, ni nga chhung atan mobile internet tihtawp a nih thu a sawi.

Manipur assembly session neih mekah ATSUM-in Manipur (Hill Areas) Autonomous District Council (Amendment) Bill 2021 pharh tura an phut laiin, chief minister N Biren Singh kaihhruai BJP sorkar chuan kar liamta Thawhlehni khan Manipur (hill areas) district council 6th and 7th amendment bills a pharh thung a, hei hi ATSUM chuan an pawm lo tih an sawi a ni.