Assam-ah JE vangin nunna chan mi 63 awm tawh

Assam state-ah Inrinni liam ta khan Japanese Encephalitis (JE) vangin mi pathum an thih belh leh a, an state-a JE vanga thi hi mi 63 an tling tawh a ni.

National Health Mission, Assam chuan Inrinni-a JE vanga thi pathumte hi Nagaon district-a mi vek an ni tih a sawi. Hemi ni hian JE kai hi mi 12 an awm belh bawk.

Thosi seh aṭanga kai theih, JE kai hi Assam-ah hian July 1 aṭang khan mi 347 hmuh an ni tawh a, state chhunga district 35 zingah South Salmara leh Karbi Anglong district tih loh, district dang zawngah chuan he hri kai hi hmuh an ni tawh a ni.

Union minister of state for health and family welfare Bharati Pravin Pawar chuan kar liam ta khan Lok Sabha-ah kum 2021 chhungin state hrang hrang zingah Assam-ah JE kai hi an tam ber tih a lo sawi tawh a ni. Kum 2021 khan Assam-ah hian JE kai hi mi 218 awmin, Jharkhand-ah mi 180 leh Uttar Pradesh-ah mi 153 an awm.

Hmarchhak state zingah Tripura-ah JE case hi 25 hmu tawhin, Manipur-ah 13 leh Meghalaya-ah mi pahnih an awm tawh bawk a ni.