Assam : KAAC election-ah rorel lai BJP an chak

Assam-a Karbi Anglong Autonomous Council (KAAC) election neih zawh takah rorel lai Bharatiya Janata Party (BJP) chuan hnehna an chang.

KAAC election-ah hian BJP chuan party malin seat 26 awmah seat 24 an la a, Asom Gana Parishad, Congress leh Hills State Demand Council-te'n seat an la miah lo thung. Party dangin seat an lak loh lai hian Independent candidate pahnih te chuan hnehna an chang a ni. June 17 khan election hi neih a ni a, kar kalta Ningani khan vote chhiar niin, result puan nghal a ni. Assam chief minister Sarbananda Sonowal chuan boruak muanawm tak hnuaiah inthlan zawhfel a ni chu lawmawm a tih thu sawiin, an party-in hnehna an chang chu thil chinchhiah tlak tak a nih thu a sawi.

Karbi Anglong hi Assam-ah pawh hmun ralṭi leh pawi­khawihna hluarna hmun nia sawi a ni a, kum dangah pawh election neih a nihin buaina leh tharum thawhna a lo chhuak fo tawh ṭhin a ni. Hetih lai hian chief minister Sonowal chuan, Karbi Anglong Autonomous Council election neih zawh tak chu inthlan buatsaih tawha boruak muanawm ber ṭum niin Pathianni khan a sawi. Assam State Election Commission pawhin election kaihnawihah buaina chhuak report an dawn loh thu leh, sum leng vak pawh a tlem thu an sawi. Hetih rual hian state police-te hmalakna chu fakawm an thih thu an sawi bawk.

KAAC hian district pahnih - Karbi Anglong leh West Karbi Anglong-te a huam a, kum 1952 kham ram danpui Sixth Schedule hnuiah council hi din a ni. KAAC hi Mikir Hills District Council tih hming puiin June 23, 1952 khan din a ni a, a hnuah Karbi Anglong Autonomous Council tia thlak a ni ta a ni.