BJP-te'n Tripura pumah Disturbed Area Act hman phut

BJP Tripura State Committee chuan Armed Forces Special Powers Act (AFSPA) hnuiah an state pumah Disturbed Area Act (DDA) hman an phut thu an sawi.

Tripura-ah hian tun hnai khan Bharatiya Janata Party (BJP) leh Communist Party of India - Marxist (CPI-M) party worker-te inkarah buaina nasa tak a chhuak a, mi tam takin hliam an tuar a ni. Hetiang thil hi a thlen tawh lohna tur leh, a thlen palh pawha buaina nasa zawk a chhuah lohna turin AFSPA hnuiah DDA hman a, sipaite hnenah thuneihna sang zawk pek an phut thu an sawi a ni. Tun hnaia buaina chhuak avang hian South Tripura district-ah Pathianni aṭang khan CrPC 144 puan niin, buina chinfel tuma hma lak mek a ni. Party pahnih inkara buaina chhuak avang hian mi 37-in hliam an tuar a, an zinga 33-te chu BJP worker an ni a, an zinga 10 chu an dinhmun a ṭha lo hle nia tarlan a ni.

Superintendent of Police Manchak Ipper chuan party pahnihte inkara buaina chhuak hi chhuizui nghal a nih thu sawiin, buaina a punlun zel lohna turin venhimna pawh khauh zawka kenkawh nghal a nih thu a sawi. DIG Southern Range Aridam Nath leh Health Minister Badal Choudhury-te chuan buaina chhuahna hmun Belonia hi an tlawh nghal a, venhimhna thawktu tam zawk tirhluh an ni bawk. Tun hma lam pawhin BJP leh CPI-M-te inkarah hian buaina a lo chhuak fo tawh a ni.