Assam CM-in Indo-Bangla Border chungchang HM sawipui

Assam Chief Minister Sarbananda Sonowal chuan Pathianni khan Union Home Minister Rajnath Singh chu Indian-Bangladesh border chung­chang a sawipui a, ramriah venhimna khauh zawka kalpui a ṭul thu a sawi.

Assam CM Sonowal chuan, Indo-Bangladesh border tihchangtlun leh ramria venhimna khauh zawka kalpui chu Home Minister pawh hian a ngaipawimawh hle tih sawiin, a thei anga ṭanpui a inhuam tih a sawi. Ramri hung hna chu thawh mek a nih thu sawiin, ram mipuite himna tura thil pawimawh a nih avangin Assam sorkar pawhin a ngaipawimawh hle a ni, a ti. Dan loa ramri kan ṭhinte chu dan tuma hma an lak mek zel thu sawiin, ramri kaltlanga dan loa ralthuam leh ruih hlo tawlhrukna hluar zel pawh khuahkhirh tura hma an lak mek thu, Rajnath Singh hi a hrilh bawk.

Home Minister chuan India- Bangladesh bor­der chungchang chu Bha­ratiya Janata Party (BJP) kaihhruai NDA sorkar ngaipawimawh te zing ami a nih thu Assam CM hi lo hrilhin, hmalakpui zel a tiam a ni. Ramri hung hna thawh mek hi June 2018-a zawhfel hman tura ruahman a ni. India leh Bangladesh inrinna hi km 4,096 zet a ni a, hmarchhak state-te nen inriin, Assam nena an inrina hi km 262 a ni. Union Home Minister Rajnath Singh hian tun hnai khan hmarchhak state - Mizoram, Mani­pur, Aruanchal, Assam, Sikkim leh Nagaland sor­kar aiawhte chu In­dian-Bangladesh border chung­changah hian mee­ting a lo neihpui tawh bawk.