Assam Forest Minister-in Samak thattute chhui turin hriattir

Assam-a Rajiv Gandhi Orang National Park-ah tunhnai sapeltute an che leh a, samak pakhat kap hlumin a ki an la a ni. He thil thleng hi Forest Minister Pramila Rani Brahma chuan chhui zui turin hriattirna a pe.

Forest department official-te chuan kar kalta Ningani khan Udalguri district-a Rajiv Gandhi Orang National Park-ah sapeltute hi an che tih an sawi a, a hnuah samak ruang hi an hmuzui ta a ni. He thil hi Park area chhunga main office aṭanga km 6 leka hla Gaspara forest camp-a thleng a ni. Forest Minister Rani Brahma chuan he thil thleng hi Park official-te chuan an bawhzui har hle a, a pawi hle a ni. Silai puak ri an hria a nih chuan forest guard-te'n an bawhzui nghal tur a ni a, inthlah dah vang a ni. He thil thleng hi a pawi tak zet a, chhui zui a ni ang, a ti.

Minister chuan he thilah hian Forest Department official-te pawh an inhnamhnawih mai theih thu sawiin, thil thlen dan kim chang chu chhui chiangin mawhphurtute chu hremna pek an ni ang, a ti. Ningani zan khan Minister hian Park hi a tlawh nghal a, a hmunah kalin thil awmdan a enfiah a ni. Pawikhawitute zawn chhuaha hremna pek an nih theih nan leh, park-a hnathawktu inthlahdah te chu hremna pek a nihtur thu a sawi. Hetih lai hian Range Officer Pranjal Baruah chuan sapeltute hi Ningani zan khan Boralimara-ah Kaziranga National Park-a forest official-te'n an man nghal niin a sawi thung.

Assama-ah hian tun hnaiah sapeltute thleng a awm fo a, hei hi tih tawp turin state sorkar chuan nasa takin hma a la mek a ni. Park hrang hranga samak leh ramsa dangte an himnna turin ruahmnan siam a ni a, park huam chhunga lirthei tlan chak theih zawk bithiah pawh siam a ni. Hei bakah hian tui lian avanga ramsa thihna a thlen lohna tur te, hemi denchhena sapeltute an chet­lohna tur tein hma a la a ni.