Tripura sorkarin Disability Rehabilitation Centre 4 din tum

Tripura sorkar chuan an state-a District Disability Rehabilitation Centre thar pali siamna turin sorkar laipuiah rawtna a thlen.

Social Welfare and Social Education department chuan tunah hian an state-a disrict pariat tan DDRC hi pali chauh a awm tih sawiin, hengte hi an state-a district pali chauh a awm laia sanction an nei, a ti. Hei vang hian centre dang pali siam belhna turin rawtna hi an thlen tih an sawi.

Deparment assistant director, L Hrangkhawl chuan press conference a neihah, an department chuan Narshingharh-ah Half Way Home pahnih dinna tur sanction an dawn thu sawiin, hei hi chhungte leh enkawltu nei lote awmna tura tih a ni, a ti. Home pahnihah hian mi 25 ve ve an awm thei dawn a, Agartala khaw pawnah sak a nih tur thu a sawi a ni.

"Rualbanlote tan hamṭhatna an dawn theih angte an dawn vek theihna turin theihtawp kan chhuah zel a ni. Rualbanlo mi 27,358 hnenah unique ID pek chhuah a ni tawh a, block hrang hrangah special camp pawh neih ṭhin a ni bawk," a ti.

Hrangkhawl chuan financial year kal mekah, rualbanlote hnenah hian an hmanraw mamawh tur 4,000 vel sem a ni tawh tih sawiin, kum thum liam ta chhungin pension scheme-ah beneficiary thar 33,085 dah belh a ni tih a sawi. Central assistance scheme hnuaia pension la hi mi 1, 58,197 awmin, state scheme hnuaiah mi 31,242 in an la bawk.