Meghalaya : Lady Keane College hnenah property tax Rs nuai 45 pe turin hriattir

Hmarchhak biala college hmasa ber zinga mi, Shillong-a Lady Keane College chu defence rama awm nia sawiin, Shillong Cantonment Board chuan service charge, Rs nuai 45 pe turin a hriattir.

Kum 1935-a din, Lady Keane College hi North-Eastern Hill University hnuaia awm a ni.

Shillong Cantonment Board chief executive officer Vijay Rajak chuan thuchhuah siamin, Lady Keane College chu Cantonment Act 2006-a Section 109 hnuaih service charge hi 1.4.2022 - 31.3.2023 atan Rs 45,25,956 pe turin a hriattir a ni.

Rajak chuan Arunachal Pradesh sorkar, Meghalaya-a Forest Department leh Weaving Department bakah Meghalaya Electricity Corporation Ltd chuan cantonment board area-a an awm man hi kumtin an pe ṭhin tih a sawi nghal bawk.

Hetih lai hian Lady Keane College principal, Khlur Mukhim chuan hriattirna an dawn chu mak a tih thu sawiin, an college chu British rorelna hnuaia awm laia din a ni a, cantonment board awm hmaa din a ni, a ti. Hemi chungchang hi state sorkarah thlen an tum tih college thuneitute chuan an sawi.