ATSUM-te kawng dan vangin motor tam tak tangkhang mek

All Tribal Student Union Manipur (ATSUM)-ten lungawi lohna lantira state chhunga hill district ho huam chhunga kawngpui an dan avangin Imphal-Dimapur inkarah nitin mamawh phur motor lian ṭhahnem tak an tangkhang mek.

ATSUM hian Manipur Legislative Assembly session-ah Manipur (Hill Areas) Autonomous District Council (Amendment) Bill, 2021 pharh tura phutin, kar liamta Zirtawpni aṭang khan kawngpui hi an dang a ni.

Kawngpui dan vang hian hill district hoah mipui nunphung pawh a khaihlak phah nasa hle tawh. Hetih lai hian ATSUM-in kawngpui an dan hi Valley area-a chengte tuartir tumna niin Meitei Leepun pawl chuan an puh a, Imphal-a ATSUM office chu an kharsak ve bawk. Buaina chhuak vang hian Inrinni khan state sorkar chuan ni nga chhung atan an state-ah mobile internet service a titawp. Bishnupur leh Churachandpur district-ah thla hnih chhung atan CrPC section 144 puan a ni bawk.

Kawngpui an dan avanga ATSUM hruaitu panga mante chu Imphal West-a chief judicial magistrate (CJM) court-a hruai an nih hnuah ni 15 judicial custody-a awm tura tih an ni.