Guwahati-a hri leng August thlaah a ziaawm beisei
Assam health minister Himanta Biswa Sarma chuan an state khawpui, Guwahati-a mipuia hri leng darh mek chu August thla tawp lamah chuan a ziaawm beisei a nih thu a sawi.
Kamrup Metropolitan district huamchhunga awm, Guwahati khawpui bikah hian hri kai hmuh chhuah hi 8,000 chuang an awm tawh a ni. Hri kai an pun chak avangin a darh zel tur venna atan June 28 aṭang khan complete lockdown puan a ni a, mahse hetichung hian khawpui chhunga hri kai hmuh hi an la pung chak hle.
Sarma chuan July 5 khan Guwahati khawpui bikah mipuiah hri hi a darh tawh tih a lo sawi tawh a, hei vang hian khawpui chhunga test runpui pawh kalpui a ni. Khawpuia cheng mi nuai 1.10 chu test ni tawhin, Covid Screening Centre 31 awm mek pawh 60-ah tihpun tum a ni, a ti. Complete lockdown an kalpui hnuah an beisei ang result an la nei thei lo tih sawiin, police leh paramalitary force-te bakah jail tang zingah hri kai hi hmuh belh zel an la ni, a ti. Kar khat chhung lockdown an pawhsei, July 19-a tawp tur chu a tawp hunah pawhsei chhunzawm zel a la ni dawn em tih sorkarin a ngaihtuah leh dawn tih a sawi bawk.
Assam-ah hian nimin khan hri kai 892 hmuh chhuah belh leh niin, an zinga 598 chu Guwahati khawpuia mi a ni. Guwahati Central Jail-a tang zinga mi 184 chu hri kai hmuh chhuah zingah hian an tel. Jail-ah hian hri kai hmuh chhuah an pun belh zel a, hei vang hian containment zone-ah pawh puan a lo ni tawh a ni. Nimin vek khan Covid-19 vangin mi pahnih an thi leh a, he hri vanga thi hi mi 50 an tling tawh. Hri kai hmuh chhuah tawh hi mi 20,646 an awm tawh a, an zinga 13,554 chu enkawl dam an ni tawh thung. State pumah sample 6,01,385 test a ni tawh bawk.
Police 20 in hna zawm tawh
Police hri kai hmuh chhuah zinga 20 chu an dam tawh avangin Ningani khan an hna an zawm leh tawh tih Additional Director General of Assam (Law and Order) GP Singh chuan a sawi. Assam police zingah hri kai hi 726 hmuh an ni a, an zinga 350 chu an dam tawh a ni. Hri vang hian police zinga pakhat a thi tawh a ni. Hri kai hmuh chhuahte nena inhnimhnaihna nei, police 778 te chu inkhung hran tir mek an ni bawk.