Manipur-ah RIMS zirlai-in hri kai

Manipur-a Regional Institute of Medical Sciences (RIMS)-a Physiology and Biochemistry department-a post-graduate zirlai pakhat chuan Covid-19 a kai tih hmuh chhuah a ni a, hei vang hian RIMS-a department pahnih chu khar nghal a ni. 

Hospital thuneitute chuan deparment pahnih hi damdawi hmanga kah thianghlim nghal a ni thu sawiin, PG zirlai hian khawi aṭangin nge hri hi a kai tih chhui zui mek a nih thu an sawi. Department pahniha zirlai leh zirtirtute chu nimin khan an sample test sak nghal vek an ni bawk. 

Manipur-a hian Ningani khan hri kai hmuh thar mi 64 awmin, heng mite nen hian hri kai hmuh chhuah tawh hi mi 1,764 an tling tawh. An zinga mi 1,129 chu enkawl dam ni tawhin, hri kai mek hi mi 635 an la awm a ni.