Assam CM-in Kaziranga Park a tlawh

Assam chief minister Sarbananda Sonowal chuan Ningani khan Kaziranga National Park a tlawh a, tuilianin a chim hmun hrang hrangte chu lawng hmangin a enkual. 

CM chuan Park chhunga ramsa awmte tuilian laka an himna tura thuneituten hma an lak dante a zawtfiah nghal bawk a ni. Darkar khat leh a chanve chhung lawng hmang hian Park hi a enkual a, Gorakati, Maro Difalu leh Mur Phuloni-a forest camp-te tlawhin, forest guard-te a kawm nghal bawk. 

Sonowal chuan media miten an kawmnaah, state sorkar chuan Kaziranga National Park-ah hian tuilian laka ramsa te insasengna tur hmun sang laite chu siam a ni tih sawiin, tun ṭumah pawh tuilian laka tlanchhia ramsa tam tak chu heng hmunah hian an  himna turin an kal tih a sawi. Park chhehvela cheng ramsa te himna tura forest department hmalakna an theihtawpa an lo puih avangin lawmthu a hrilh nghal bawk a ni.

Kumina tuilian chuan an state-a district 28-ah harsatna thlenin, thlai chinna ram zau tak a chim chhiat tawh bakah mi 80 chuangin nunna an chan phah tawh tih a sawi.