China sipai-te'n Sikkim-ah LAC an paltlang General Bipin Rawat-a'n Sikkim tlawh dawn

China sipai People’s Liberation Army (PLA)-te chuan India leh China inrinna, Line of Actual Control (LAC) paltlangin, Sikkim-a Doka La sector an lut a, Indian bunker pahnih an tichhia nia tarlan a ni.

China sipai te Doka La sector-a Lalten area-ah an lut tih hriat a nih ve leh Indian Army chief General Bipin Rawat hriattir a ni. Army chief General Bipin Rawat hian thil awm dan enfiah turin Sikkim hi a tlawh dawn niin media-te chuan an tarlang. Hetih lai hian Indian Army leh Defence Ministry-te chuan thuchhuah an la siam lo thung. Chinese Defence Ministry thuchuah chuan an sipai ten ramri an kan ngei thu hi sawiin, China sorkarin heng lai hmuna inkalpawhna kawngpui a siamte endik tur leh humhim turin an kal a ni, a ti. Chinese Defence Ministry thupuangtu Ren Guoqiang chuan, India sipaite chuan ram pahnihte inremna bawhchhiain ramri depah hian an che niin, Thawhṭanni khan a puang thung. "China sorkar chuan a ram chinah inkalpawhna kawngpui a sial a, hei hi dan kalh a ni lo. India sipai-te hi an huang chin pelin an che zawk a ni" a ti.

Hetih lai hian Indian Army-te chuan China sipai te hian LAC paltlangin India ram chhungah an rawn lut a, hei hi lo chhangletin an ramah umkir an nih thu an sawi ve thung. Ramri chungchangah hian buaina a lo awm fo tih sawiin, June 20 pawh khan People’s Liberation Army (PLA)-te nen hian ramri chungchangah meeting neih a nih thu an sawi. Tun ṭuma PLA-te chetdan hian inremna lo siam tawh chu an bawhchia tih sawiin, he lai hmunah hian chhunzan zawmin venhimna khauhzawka kenkawh nghal a nih thu an sawi bawk.

Ram pahnihte inkar boruak a ṭhat loh avang hian China sorkar chuan Tibet-a Kailash Mansarovar Lake tlawha zintum Indian khualzin eng emaw zat chu a lo dang tawh a ni. Khualzinte hian Nathu La route aṭngin Tibet hi pan an tum a, mahse China chuan remti loin a lo dang a ni. Chinese Foreign Ministry thupuangtu Geng Shuang chuan khualzinte dan an nih chungchangah hian ram pahniha foreign ministry aiawhte chuan inbikna an nei tih a sawi. Hetih rual hian India chuan Sikkim-a rampahnihte inrinnaah hian huang zauh zel a tum niin a sawi. China sorkarin ramri dep, Donglang sector-a kawngpui a siam mekah pawh India chu inrawl tumah a puh bawk.

Ram pahnihte hian ramri chungchanga an ṭannaah tlawm zawk nih an tum loh avangin buaina hi chinfel mai theih a beisei awm loh nia tarlan a ni. Beijing-a 'One Belt One Road summit' neih a nih ṭum pawhin India chuan China rawtna te chu pawm thei loin a hnawl a, inbiakna hi vawi eng emaw zat neih ni tawh mah se tun thlengin chinfel a la ni lo. November 2008 khan Chinese forces-te chuan Sikkim-ah hian Indian Army bunker an lo tichhe tawh nia tarlan a ni bawk.