Assam : Tui lian tuar an punbelh

Assam-a tui lian chuan ziamawm lam a la pan thei lo a, district pali-te chuan tuilian tuar ve lehin, tuin lian avanga harsatna tawk mek hi district pariat an awm mek a ni.

Assam State Disaster Management Authority (ASDMA) chuan tun hnai­ah ruah a sur leh avang­in tui lian tuar hi an punbelh leh tih an sawi. Lakhimpur, Karimganj, Jorhat, Kar­bi Anglong, Hojai, Gola­ghat, Sivasagar leh Sonit­pur district-a khaw 126 chuan tui lian hi an tuar mek tih sawiin, heng hmunah te hian ngawr taka chhawmdawl hna thawh a nih thu an tarlang. District pariat-a tui lian tuar zat hi mi nuai khan an chuang leh tawh a, thlai chinna hmun ram hectare 170 zet chu tui hian a chim tawh bawk. Lakhimpur district chu a tuar nasa ber niin, thlai chingtute chuan harsatn hi an tawk nasa hle nia tarlan a ni.

Sonitpur district-ah chuan tui lian avanga chenna-in nei te awmna tur relief camp pariat sak a ni tawh a, Karimganj-ah pawh relief camp hi sak niin, chenna-in nei lo hi mi 11,700 vel an awm mek a ni. Hmun hrang hrangah relief camp hi sak belh mek zel a ni a, heng hmuna awmte hi ei leh in tur bakah, damdawi te pek an ni. State sorkar chuan tui lian tuarte hi theih ang anga chawmdawna pek an nih tur thu a puang bawk.

Hetih lai hian Majuli district-ah pawh tui lian avangin lei nasa takin a tawlh a, hei hian mi tam tak tan harsatna a thlen ve mek bawk. Majuli hi thliarkara awm a nih avangin tui hi a lenbelh zel chuan a hlawh thei viau dawn nia tarlan a ni a, chhungkaw eng emaw zat chu inralring tura hriattir an ni. Majuli hi Chief minister Sarbananda Sonowal-a bial niin, khawvel river island lian ber a ni.

Assam-ah hian lui lian tak tak eng emaw zat a awm a, chung zingah chuan Dhansiri leh Katakhal-te chuan district eng emaw zatah hlauhawm chinchiahna an pel tawh a, mipuite chu chi ai lo tur leh himna zawnga inthiarfihlim tura hriattir an ni.