Nagaland Police-te'n ruihhlo kaihhnawihah mi 560 man tawh
Nagaland police-te chuan tunhnai thla 18 chhungin dan loa ruihhlo tawlruk kaihhnawiah mi 560 man an ni tawh tih an tarlang.
Police-te'n thla 18 chhunga dan kalha ruihhlo tawlhruk an man te hi - ganja (9711 kg), opium (63.75 kg), heroin (12 gram), brown sugar (4.5 kg), Yaba (1 kg), spasmo proxyvon (5,27,626 capsule), syrup (12,297 bottle) leh India Made Foreign Liquor (IMFL) (2,02,919 bottle)-te a ni. Inspector General of Police (Crime) Kewetso Mero chuan heng ruihhlo tawlhruk kaihnawihah hian mi 560 man an ni tawh tih a sawi. Kewetso Mero chuan ramri kana ruihhlo tawlhruk a hluar zel thu sawiin, hemi tirem tur hian nasa taka hma an lak thu a sawi. State pawn aṭnga ruihhlo chawk luh bakah hian tualchhung aṭanga ganja tharchhuah pawh a pun thu a sawi bawk.
IGP Mero chuan hmarchham hmun hrang hrangah ruihhlo tawlhrukna a hluar chho zel chu pawi a tih thu sawiin, hemi veng tur hian ṭanrual a ngai tih a sawi. Hmarchhak chu ramri depa awm a nih avangin dan loa ral thuam leh ruihhlo tawlhrutute tan kawngpui pawimawh a ni a, hei hi tihtawp thuai a nih loh chuan a pawi hle dawn a ni, a ti.