Sorkar laipuiin NSCN-K-te inbikna neihpui tum lo

Sorkar laipui chuan Myanmar-a inkulh Naga hel pawl - National Socialist Council of Nagaland-Khaplang (NSCN-K)-te chu remna zawnga inbikna neihpui a tum tih, Ceasefire Monitoring Group Chairman D.K. Pathak chuan a sawi.

Monitoring Group Chairman D.K. Pathak chuan Meghalaya, Assam Rifles headquarters-a thutharthehdarhtute a kawmnaah he thu hi sawiin, NSCN-K-te inbiakna neihpui turin sorklar laipui chuan hmalakna a nei rih lo a ni, a ti. NSCN-K hi Naga hel pawl lian tak niin, India ram leh Myanmar-a Naga-te chu mahni rorelna hnuaiah an awm theih nan inlakhran phutin sorkar lakah a hel a ni. Kum 2015 khan sorkar laipui nen inrem lailawkna an siam a, inremna tluantlimng siam tura inbikna neih leh tura ruahman a ni. Mahse tun thlengin inremna tluantling a la awm lo a, sorkar laipuiin inbikna neihpui tura hma a lak loh thu puan a nih tak bawk avangin inrem­na hi a la awm mai dawn lo niin a lang.

NSCN-K chairman S.S. Khaplang chu June 9 khan Myanmar-ah a boral a, hei hian an hma lam hunah nghawng lian tak a neih mi tam tak chuan an ring. Amah thklak tur hian Khango Konyak chu ruat a ni tawh a, a kaihhruaina hnuiah hian engtiangin nge hma an lak zel dawn hriat a ni lo. Nagaland Chief Minister Shurhozelie Liezietsu chuan Khaplang-a kaihruaina hnuiah khan inbiakna neih a lo ni fo tawh a, a awm tak loh avangin an thil phut hi a hlawhtling mai dawn lo niin a sawi ve bawk. Hetih rual hian Nagaland sorkar chuan NSCN-K-te dawr turin palai a tir tih sawiin, Myanmar-ah ṭum hnih inbikna neih a nih tawh thu a sawi. Liezietsu chuan, Naga helte chu India ramah rawn leta sorkar laipui nena inbikna nei turin a kaihhruai sorkar chuan a duh tih a sawi bawk.

NSCN-K-te hi sorkar laipui chuan kum 2001 khan inrem lailawkna a lo siampui tawh a, March 27, 2015 khan Framework Agreement ziah a ni leh bawk. Mahse Khaplang-a pawlte hian tharum thawh leh pawikhawihna thlen an bansan chuang lo a, Nagaland leh Manipur-ah India sipai eng emawzat an that tawh a ni. June 4, 2015 khan Chandel district-ah India sipaite an lambun a, hemi ṭum hian sipai 18 zet an thi a ni.