AP-ah hel hoin security force an bei

Arunachal Pradesh-a Indo-Myanmar international border-ah nimin zing khan hel nia hriatten Assam Rifles (AR)patrol team an bei.

Helte hian AR patrol team hi lo changin, Changlang district-a Indo-Myanmar border-a pillar 173 bul, Pangsau Pass-ah zing dar 4 velah an lo kap a, junior commisisoned officer (JCO) in hliam a tuar. Sipaite hian kap let ve nghalin, hun eng emaw chen an inbei zui a ni.

Changlang district SP Mihin Gambo chuan Pangsau Pass-ah zing takah khan inkap thawm hi an hriat thu sawiin, helte hi eng pawl ber nge tih an la chiang lo tih a sawi. Mahse pawikhawihtute hi NSCN(K) leh ULFA(I) helpawlte nia rin an ni.

Security force-ten an beih let hnuah helho hi an tlanchhia a, AR sipaite chuan man chhuah ngei tumin beihpui an thlak zui bawk.

Independence Day lawm tura inbuatsaih mekah, helhoin tihbuai an tum nia report a awm avangin venhimna lam pawh khauh taka kalpui a ni a, AR sipaite pawh an duty uluk hle a, a bikin border area-te chu ngun takin an vil reng bawk.

Hmarchhak biala helpawl tam zawk hian Myanmar ram chin, ramhnuaiah camp-te an nei hlawm a, Arunachal Pradesh kaltlang hian India ram lamah rawn lutin pawikhawihna an thlen fo ṭhin a ni.

Tun hnaiah Assam Rifles sipaite hian Tirap, Longding leh Changlang biala helho lakah beihpui thlakin, hel eng emaw zat an lo man tawh a ni.