Manipur Police-ten ATSUM hruaitute chhuah, Zirlai pawlin kawngpui dan an titawp

Manipur police-te chuan All Tribal Students’ Union Manipur (ATSUM) hruaitu panga an mante chu kar khat dawn an hren hnuah Thawhṭanni khan an chhuah. Thawhṭanni zan aṭang khan ATSUM chuan hill district-a kawngpui an dante an titawp ve bawk.

ATSUM hian Manipur Legislative Assembly session-ah Hill Areas Committee (HAC) thlawp, Autonomous District Councils (ADC) Amendment Bill, 2021 pharh an phut a ni. An thil phut nawrna atan hian kar liam ta Zirtawpni aṭang khan hill district-ah kawngpui an dang a, hei vang hian valley area-a nitin mamawh phur lut tur motor lian tam tham tak chu kawngpuiah an tangkhang a ni.

Tribal zirlai pawlte thil phut zawm loin, minister for tribal affairs and hills department Letpao Haokip chuan Manipur (Hill Areas) District Council (sixth amendment) Bill 2022 chu a pharh lui a, Manipur (Hill Areas) District Council (seventh amendment) Bill 2022 chu HAC-in sawiho leh turin a ti bawk.

ASTUM in nawrh huaihawt an tum thu an puan ni, August 2 khan police-te chuan an pawl hruaitu pangate hi an man nghal a, an zingah hian president leh general secretary pawh an tel. Zirlai pawl hian an pawl hruaitute hi chhuah tur leh, House-a bill pharh tura an phut tihlawhtling tura sorkar nawrna atan Zirtawpni aṭangin hill district-a national highway an dang a, motor lian 1,200 vel an tangkhang hman a ni. Ni tin mamawhte phurh luh theih a nih loh avangin valley region lamah an buai phah tawh a ni.

Kawngpui dan a nih hnuah state sorkar chuan zirlai pawlte hi inremna siampui tumin ṭum eng emaw zat meeting a neihpui hnuah inremna hi an siam thei ta a ni. Inremna an siam angin zirlai pawl hruaitute hi chhuah niin, an laka FIR thehlutte pawh sut leh vek a ni ang.