Independence Day zawhah Assam- Meghalaya border talk chhunzawm dawn

Meghalaya chief minister Conrad K Sangma chuan Assam-Meghalaya ramri buaina chinfelna tura inbiak thawh hnihna chu Independence Day zawhah chhunzawm a ni tawh dawn tih a sawi.

CM Sangma chuan, "August 7 khan Assam chief minister Himanta Biswa Sarma nen meeting kan nei a, Independence Day zawhah inbiakna hi chhunzawm turin kan ti a ni," a ti. A ni tak erawh chu an la ruat fel lo tih a sawi nghal bawk.

Assam leh Meghalaya state-te hian kumin March 29 khan ramri chungchanga buaina an neihna hmun 12 zinga hmun parukah inremna hi an siam tawh a, a bak hmun dang paruka inremna siam leh hi a tum a ni.

Sangma chuan inbiak thawh hnihna neih hmasak bera an ngaihtuah tur zinga mi, Raid Nongtung aiawhte pawh a hmu tawh tih a sawi. Raid Nongtung hnuaiah hian thingtlang khaw 34 a awm a, heng zinga khaw 18-te chuan Meghalaya lama beh an duh a ni.

Chief Minister chuan a kaihhruai Meghalaya Democratic Alliance (MDA) sorkar chuan ramri buaina chu chinfel vek a tum tih a sawi a, a hmaa area paruka inremna an siam dawnah pawh ramri hrula chengte chu uluk taka kawm an ni a, mipuite ramri buaina hi chinfel thuai an duh avangin inremna pawh hi an siam niin a sawi. Hemi rual hian area paruk chungchanga inbiakna an neih turah state pahnihte chuan inremna siam ngei tum mah se, hmanhmawh taka tihfel theih mai a ni lo a, hun a duh dawn tih a sawi nghal bawk.

A hmaa an lo tih tawh ang bawkin, state pahnihte hian regional committee an din leh ang a, committee-te hian an buaina neihna hmunte hi tlawhin hma an la chho dawn a ni.