Meghalaya-ah marjijuana Rs vbc 4.7 hu an man

Meghalaya police-te chuan Thawhlehni zan khan East Jaintia Hills district-ah marijuana kg 1,500 chuang an man a, an thil man hi Rs vaibelchhe 4.7 man hu a tling.

Anti-Narcotics Task Force (ANTF) chuan Thawhlehni vek khan Shillong-a Polo market area-ah ruihhlo zuar mi 37 an man bawk a, an zingah hian hmeichhia panga an tel. Polo market area-a an dapna aṭang hian heroin gram 8.97, cannabis gram 286.93, Nitrazepam tablet 20, vial 330, syringe 10, mobile phone 6, scooter pakhat, local taxi pahnih leh pawisa fai, Rs 1,49,280 an man tel bawk.

Assam-ah zu Rs nuai 58 man hu tichhia
Assam-a Karbi Anglong district-ah Thawhlehni khan Assam police leh state excise department-ten zu an man, Rs nuai 58 man hu chu tihchhiat a ni bawk.

Bokajan hmunah hian zu an man khawm, bur 30,000 chu bulldozer-in an chil chhiat tir a, an zu tihchhiat hi whiskey litre 10,124 leh beer litre 20,294 a ni. Heng zu an mante hi Arunachal Pradesh leh Meghalaya-a siamten an ni.

Chief minsiter Himanta Biswa Sarma chuan August 2 khan excise deparmtent official-te chu Arunchal Pradesh aṭanga dan loa zu lakluh ṭhin venna atan Assam-Arunachal Pradesh border-ah temporary check-point siam turin a lo hrilh tawh a ni.