Tripura : Hel inpe ten kawngpui dan an tum

Tripura sorkar kuta hel inpe, Deprived Returnees Movement Committee (DRMC) leh Joint Action Committee (JAC) chuan an thil phut pakuate tihhlawhtling tura nawrna atan Assam-Agartala National Highway chu tiam chin awm loa dan an tum.

DRMC general secretary Amrit Reang chuan, "Tribal welfare minister Rampada Jamatia pawh ṭum hnih kan hmu tawh a, kan thil phutte hi tihhlawhtlin a ni thuai ang tiin min hrilh a ni. June leh July thla khan meeting hi neiin, Minister hian ziak ngeiin min tiam. Mahse thla a liam leh hnuah pawh state sorkar lam aṭangin hmalakna engmah a la awm lo a ni," a ti.

Sorkarin an thil phut hi a ngaihven zui loh avangin August 19 aṭangin tiam chin awm loin Assam-Agartala kawngpui hi dan an tum tih sawiin, sorkar chu August thla chhung ngeia a thutiam tihhlawhtling turin an phut tih a sawi.

Reang chuan August thla chhunga an thil phut ngaihtuah a nih loh chuan, assembly inthlan hmabak an nih avangin model code of conduct hman a ni chho ang a, a khawtlai zel dawn a ni, a ti.

DRMC thil phut zingah hian hel inpete chhawmdawlna pek, an eizawnna tura rubber plantation siamsak, PMAY hnuaia an chenna in tur sak, agriculture leh horticulture scheme hrang hranga hamṭhatna pek, an fate zirna ngaihtuahsak leh thubuai an la neih chinfel ngenna te a tel.