APSC Scam : Assam Police-te'n Invigilator 27-te signature la
Assam police-te chuan Assam Public Service Commission hnuaia thamna sum lak thubuai a chhuina kal zelah Ningani khan invigilator mi 27-te signature an la.
Kum 2014 khan APSC hnuaia hna lakah thamna sum tam tak a leng a, hei hi hun rei tak chhung chhui a ni tawh a, chhui mek zel a ni. Ningani khan Assam Police Special Branch headquarters, Guwahati-ah invigilator 38-te chu inlan tura koh an ni a, an zinga mi 27-te chu an inlan a ni. Signature lak te hi forensic laboratory-ah endik tura tih a nih thu police-te chuan an sawi a, answer script-a signature te nen khan a inmil em tih endik a ni ang. Hemi atan hian answer script 1,265 lakkhawm a lo ni tawh a, heng te hi kum 2013 leh 2014 exam a mi te a ni.
He thil thlenga mawhphurtu bera puh APSC Chairman Rakesh Paul chu suspend a ni tawh a, official dang eng emaw zat man an lo ni tawh bawk a ni.