Assam-ah national flag nuai 53 chuang hralh tawh

Sorkar laipuiin India zalenna champha vawi 75 puala in tina India flag zarna tur, Har Ghar Tiranga programme a kalpui mek hnuaiah, Assam-ah chuan national flag hi nuai 53 chuang hralh chhuah a ni tawh. Flag hralhna aṭanga sum hmuh hi Rs vbc 16.07 a tling tawh.

Assam State Rural Livelihood Mission (ASRLM) hnuaiah self-help group-te siam national flag hi nuai 33 hralh a ni a, fair price shop hrang hrang aṭangin nuai 20 hralh a ni tawh bawk.

State sorkar chuan August 13-15 chhunga mimal chenna, sorkar leh private office bakah zirna in hrang hrangah hian national flag hi nuai 80 vel tar turin target a siam a ni.

Chief minister Himanta Biswa Sarma chuan twitter-ah Har Ghar Tiranga campaign chu an state-ah ngawrh taka kalpui mek a ni tih sawiin, nuai 53 chuang hralh chhuah a ni tawh chu lawmawm a tih thu a sawi. He programme-ah hian mipuite an tel ve theihna turin a hma ang bawkin flag chu a thlawna sem chhuah ngawt ni loin, mipuiten an duh thua an leina turin ruahmanna an siam tih a lo sawi tawh a ni. National flag hi Rs 18 in an hralh chhuak a ni.

State ‘Orunudoi’ scheme dawngtu, mi rethei mi nuai 22-te hnenah thla tina an bank account-a sorkarin Rs 1,000 a thunsak ṭhin bakah, August thla bik atan chuan flag leina man Rs 18 hi thun tel a ni dawn bawk tih CM chuan a sawi.

July 31 khan Assam sorkar hian Har Ghar Tiranga programme kalpuina tur hian theme song leh video pawh a lo tichhuak tawh a, awareness rally-te a buatsaih a ni.

Kohima-ah Tiranga rally buatsaih
Nagaland khawpui, Kohima-ah Nilaini khan India zalenna champha vawi 75 lawmna puala Har Ghar Tiranga campaign peng pakhat atan Tiranga rally buatsaih a ni.

Rally hi khawpui chhunga chhim leh hmar lam aṭanga neiin, MLA junction-ah intawkkhawmin, Deputy Commissioner Shanavas C chuan thu a sawi. Shanavas chuan rally chu India ram zahna leh ram mipuite zalenna hlut zia lantirna a ni tih sawiin, mipuite chu ram zahna lantira a theihna hmun apiangah national flag zar turin a chah.

Tiranga rally-ah hian police leh zirlaite chu an uniform nena telin, national flag an keng bawk.

Manipur-ah Walkathon neih a ni
Manipur-a Churachandpur district-ah pawh Har Ghar Tiranga campaign peng pakhat atan Nilaini vek khan walkathon buatsaih a ni.

Walkathon hi Tuibong-a Mini-secretariat aṭanga Hiangtam Lamka-a Public Ground thlengin neih a ni a, District Deputy Commissioner, Sharath Chandra Arroju chuan cycle rally leh bike rally-te pawh buatsaih a ni dawn tih a sawi. District mipuite chu campaign an neih mek chu ṭha taka thawhpui tura sawmin, national flag chu an inah tar vek turin a ngen.