Anti-national social media group-ah tel lo turin hriattir

Manipur sorkar chuan sorkar hnathawkte chu social media group-a India laka inlakhran duhtu, sorkar dodal zawng leh khawtlanga chi inthliarna lam hawi chi-ah awm lo turin a hriattir.

Nilaini zan kha hemi chungchangah hian special secretary (Home) H Gyan Prakash chuan memorandum tichhuakin, state sorkar hnuaia hnathawkte chuan WhatsApp leh Facebook-ah group an sawi ang chi ah khian an awm a nih chuan, August 12 zan dar 6 hma ngeiin group-te chu chhuahsan turin a ti a ni.

Memorandum-ah hian, "Social media platform - Facebook, WhatsApp leh chatgroup dangahte inlakhran duhna lam thu te, sorkar laipui leh state sorkar dodalna lam te, khawtlang tibuai leh ṭhendarh zawnga thusawina a tam a, heng thil hian state chhunga inlungrualna leh boruak muanawm tak awm mek chu a tichhe thei a ni, tiin an tarlang. Heng group-ahte hian sorkar hnathawk tam tak, senior officer thleng pawha an awm thu an dawng tih a tarlang bawk.

Inlakhran duhtu leh sorkar dodalna lam zawnga group siamte hian thu dik tawk lo te, inhuatna chawk tho thei chi thusawi leh video-te pawh an tidarh niin memorandum-ah hian sawi a ni bawk. Hei vang hian sorkar hnathawkte chu heng group-te chhuahsan vek tura tiin, hun pek chhunga an chhuahsan loh chuan All India Services (Conduct) Rules 1968 leh Central Civil Services (Conduct) Rules 1964 bawhchhiat avangin an chungah disciplinary action lak a nih tur thu sorkar chuan a sawi.