BJP President-in Tripura a tlawh dawn

BJP national president JP Nadda chu August 27 hian ni hnih cham turin Tripura-ah a zin dawn.

Tripura state hian nakkumah assembly inthlan an hmachhawn dawn a, inthlan neih tura atana an pawl inbuatsaih dante Nadda hian a enpui dawn tih state party vice president Rebati Tripura chuan a sawi.

Nadda hian a cham chhungin party office bearers leh core committee-te meeting a neihpui dawn a, BJP thawhpui, Indigenous Peoples Front of Tripura (IPFT) hruaitute pawh a kawm bawk ang. State BJP hian August 28-ah Agaratala-ah rally huaihawt an tum bawk a, Nadda hian thu a sawi nghal dawn a ni.

BJP President hian Tripura state tlawh a tum hi Covid hri leng avangin ṭum hnih a lo ṭhulh tawh a ni.

Tun thla tir lamah khan chief minister Manik Sabha chu New Delhi-ah zinin Nadda hi a zu hmu a, an state chhung politics dinhmun te, BJP hma lak dante a zu sawipui a ni.

Nakkum maia assembly inthlan an neih dawn karah, Tripura-a rorellai BJP hian May thla khan an party hruaitu an thlak. Biplab Kumar Deb chu chief minister aṭanga bangin, a thlaktu atan Saha hi CM ni turin an thlang zui a ni.