Assam : Tuilian avanga harsatna tawk an pung zel

Assam-ah district pariata cheng mi nuai hnih chunga zetin tuilian avangin harsatna an tawk mek.

Tuilian hi district pariat-a khaw 453 ten an tuar a, an harsatna tawhte hi a la pun chhoh rin a ni. Lui eng emaw zat chu tunhnaia ruah sur nasa avangin an lian a, hmun tam takah hlauhawm chhinchhiahna chungah an luang a ni. Assam State Disaster Management Authority (ASDMA) chuan Barpeta, Lakhimpur, Jorhat, Karimganj, Cachar, Dhemaji, Karbi Anglong leh Biswanath district-te chu tuilian avanga harsatna tawk nasa zual an nih thu a tarlang. ASDMA chuan heng district-a tuilian tuarte mi nuai 2.68 vel an tling tawh niin an tarlang a, Karimganj district chu a tuar nasa ber niin mi nuai 1.53 velin harsatna an tawk a, Lakhimpur district-ah pawh tuilian tuar hi mi 76,000 vel an awm bawk a ni.

Sonitpur district-ah pawh khaw eng emaw zat chu tui-in a chim tawh a, chhungkaw tam takin an in leh lo an chhuahsan tawh a ni. Mi eng emaw zat chu hmun him lamah sawn chhuah an ni tawh a, an chen lailawkna tur ngaihtuah sak an ni. Tuilian avanga harsatna tawkte hi relief camp hrang hrangah dah an ni a, mi 5,670 vel chu relief camp 269-ah dah an ni. Thlai chinna hmun ram hectare 5,272 vel zeta zau chu tuilian hian a chim tawh bawk a, hei hian chhungkaw tam tak eizawnna a nghawng a ni. Barpeta, Lakhimpur, Dhemaji, Karbi Anglong leh Biswanath-ahte lei eng emaw zat chu tuilian hian a la tih tarlan a ni a, hei hian hmun tam takah inkalpawhna a tibuai hle.

Golaghat district-a Dhan­siri lui chuan hlauhawm chhin­chhiahna a pel a, mi tam takin himna zawngin an in leh lo an chhuahsan. Chenna neilo tan relief camp eng emaw zat sak a ni a, heng hmunah te hian ei leh in tur pek an ni. Sonitpur Ditrict pawhin Jia Bharali lui lian avangin harsatna an tawk nasa hle a, Barak lui lian pawhin Cachar leh Karimganj district-a chhungkaw tam tak tan harsatna a thlen ve mek bawk. Karimganj district-ah hian Katakhal lui lian chuan Hailakandi leh Kushiara tan harsatna a thlen a, mi tam takin an in leh lo an rauhsan tawh a ni.

Jorhat, Karimganj, Karbi Anglong, Sonitpur leh Cachar district-ah hian chenna tur nei lo mi 4,000 vel zet an awm nia tarlan a ni a, relief camp siamah an leng lo a ni. Tuilian avang hian hmun tam takah inkalpawhna leh inbiak pawhna a buai phah a, ei leh bar lakkhawm kawngah pawh harsatna a thleng chho mek a ni. State sorkar chuan ngawrh takin chhawmdawl hna a kalpui mek a, harsatna tawk an pun chhoh zel bawk avangin harsatna hian eng chen nge a awh dawn hriat a ni lo. Kumin June thla tir lam aṭang khan Assam hian tuilian a tuar ṭan a, tun thlengin an la tuar a ni. Tuilian tuar hi tlahniam hma mah se, tun hnaiah ruah a sur leh avangin an pung chho leh a ni. Tuilian tuar hi mi 50,000 velah an tlahniam hman a, mahse tunah chuan district pariat-a mi nuai hnih chuangin harsatna hi an tawk leh mek a ni.

Hetih lai hian Manipur-ah pawh lui eng emaw zat chu hlauh­awm chhinchhiahna chungah an luang a, mi eng emaw zat chu hmun him lamah thiar chhuah an ni. Irrigation and Flood Control Minister Lepao Haokip chuan tuilian avanga harsatna thlen theihna hmun hrang hrangte a tlawh kual a, thil awm dan a thli thlai a ni. Harsatna a thlen thulha mipuiten sorkar an hriattir zung zung theihna turin emergency telephone helpline siam a ni. Chief Minister N. Biren Singh pawhin harsatna tawk an awm thulha ṭanpui hna thawk nghal thei turin deparmenty offical-te chu inralring tura hriattir an nih thu a sawi.