Meghalaya-in minister leh sorkar hnathawkte An hlawh a pe kim dawn rih lo

Meghalaya sorkar chuan hri leng vanga state-in sum lama harsatna a tawh avangin cabinet minister-te bakah sorkar hnathawk 80,000 te chu an hlawh a pe kim dawn rih lo tiin thuchhuah a siam. 

CM Conrad K Sangma, cabinet minister leh IAF, IPF, leh IFS officer-te hlawh chu a zahve chauh pek an ni rih dawn tih chief secretary M S Rao chuan a sawi. All India Services officer, an state-a deputation-a awm mekte pawh pek kim a ni dawn rih lo. 

Chief secretary chuan he thutlukna hi Covid-19 lengin harsatna hrang hrang a thlen vanga siam a nih thu a sawi a, thla khat chuang lockdown kalpui chuan rampum leh state economy dinhmun a nghawng na hle tih a sawi bawk. Hei vang hian sorkarin sum a hmanna kawngah pawh  khuahkhirhna siam a, hri leng dona kawnga hma a lak chhunzawm zel theihna tura sum an hmuh theih dan angte a ngaihtuah a ngai a ni, a ti. 

April thla hlawh hi May-ah pek an ni dawn a, May thla hlawh pawh June-ah pek an ni ang, tiin Roa chuan a sawi. 

Sorkar hnathawk, Group A leh B officer-te chu an hlawh 35% pek an ni dawn rih lo a, Group C-te hlawh pawh 25% pek tel an ni dawn rih lo a ni. Mahse Health and Family Welfare department-a officer leh staff, Home (Police) leh  Home (Civil Defence and Home Guards)-a Group C te hlawh hren sak ṭhen an ni lo ang. 

Sorkar chuan sorkar hnathawk hrang hrangte  hlawh ṭhenkhat a tihkhawtlai sak tur thu a sawi rual hian, Group D leh pension-te hlawh erawh  pek kim an ni dawn tih a sawi thung.