India-China Border : China-in map thar tichhuak

India leh China-te'n tun hnaia Sikkim leh a chheh vela buaina an neih hnuah China sorkar chuan a ram chin tarlanna map thar a tichhuak.

Chinese Foreign Ministry chuan map hi a tlangzarh a, Donglong region-a a ram chin leh a thuneihna chinte chiang takin a tarlang a ni. Donglong hi India, China leh Bhutan-te inrina lai a ni a, mahse China chuan a ram chinah a rinlut a ni. Donglong hi Bhutan leh China-te chuan an inchuh fo a, mahse China chuan a thuneihna huamchhunga awm niin a chhal. China chuan June 18 khan India sipaite chuan ramri kanin Donglong hi an lut niin a sawi a, India sipaite chu inthiarfihlim turin a hriattir a ni. Heng lai hmuna China sorkarin inkalpawhna kawngpui a siam mek te chu tihtawp tuma cheah India sipai-te chu a puh bawk.

Hetih lai hian India chuan China sipai, People’s Liberation Army-te chu India ram chhunga lutah a puh let ve thung. Ram pahnihte inkarah hian boruak ṭha lo awm zuiin, sipai te chu ramriah hian an inep a ni. Indian Army leh People’s Liberation Army 3,000 vel ve ve te chu ramriah hian a ṭul huna che mai thei tura inralrin tir an ni. Mahse ram pahnih sipai hruaituten inbiakna an neih hnuah boruak duhawm lo zawk awm loin an inṭhaṭhen thei ta a ni. Sipaite hi inthiarfihlim tawh mah se China chuan a ram chin tarlanna map a tichhuak zui nghal a, Bhutan leh India-te nena an inrina Donglong chu a ram chin huam chhunga awm niin a tarlang zui ta a ni.

India chuan Beijing chetdan hi kum 2012-a inremna lo ziah tawh India-China agreement bawhchhiatna an nih thu a sawi. Bhutan pawhin China chetdan chu a dem thu sawiin, he lai hmuna inkalpawhna kawngpui a siam mek pawh titawp tura a duh thu a sawi. Hetih lai hian Chinese Foreign Ministry thupuangtu Lu Kang chuan he lai hmuna kawngpui sial hian border agreement a bawhchhe lo nin a sawi. Donglong region-ah hian hmasang aṭang tawhin Tibet mi te an lo cheng tawh ṭhin tih sawiin, Tibet chu China rorelna hnuaia awm a nih avangin he lai hmun hi China chuan a ram dik takah a ngai a ni. Kum 1960 hma lam khan China sorkar phalnain Bhutan mi te chuan heng lai hmunah hian bawng an vulh a, a thuneitu dik tak chu China an ni, Lu Kang chuan a ti bawk.

Hetih lai hian China official news agency chuan India chu ram pahnihte inkara buaina chawchhuak zawnga che lo tura a duh thu Pathianni khana tarlang. Xinhua news agency chuan, Sikkim-a China-India boundary chu kum 1890-a Sino-British treaty-ah khan chiang taka tarlan a nih thu a tarlang a, hei hi India a independence hnuah pawh tihdanglam a ni lo, a ti. Hetihrual Hin India chuan kum 2012 khan ram pahnihte remtihna in ramri hi siam a nih thu a sawi.

India External Affairs Ministry chuan, China sorkar chetdan hi pawmzam mai theih a ni lo a, hei hian inremna lo siam tawh chu a bawhchhia a ni, a ti. China sorkar chu ramdang zah loah puhin, India khualzin-te'n Nathu La Pass kaltlanga Tibet-a Kailash Mansarovar an tlawh tur a dang pawh a dem takzet tih a sawi. Donglong region-a inkalpawhna kawngpui sial chu ramria buaina chawkchhuak zual thei a nih thu sawiin, nghawng ṭha lo zawk a neih a hlauhawm thu a tarlang bawk. India-China Border-a buaina chungchanga hma la tur hian India Army Chief General Bipin Rawat chuan Sikkim a lo tlawh tawh a, sipai hotute meeting a neihpui a ni. Sikkim bakah hian hmarchhaka Army headquarters hrang hrang a tlawh kual bawk. Heng bakah hian sorkar laipui kaihruaina hnuaiah high-level meeting neih a lo ni tawh bawk a, Home Ministry, Indian Army leh Indo Tibetan Border Police aiawhte chuan ramria buaina awm ṭhin chungchang an sawiho a ni.

Donglong region-ah hian China chuan India Army bunker-te chu bulldozer hmangin a lo tichhe tawh bawk a ni.India-China Border : China-in map thar tichhuak