Assam sorkarin SRPF din dawn

Assam sorkar chuan an state chhunga samak venhimna kawnga hna thawktu tur Special Rhino Protection Force (SRPF) a din dawn.

Forest Minister Pramila Rani Brahma chuan SRPF din a nih tur thu hi kar kalta Inrinni khan a puang a, thawktu turte pawh lak thuai an nih tur thu a sawi. State sorkar chuan hemi atan hian recruitment a tichhuak tawh a, mi 90 lak an ni dawn a, kumin August thla hian lakfel hman a ni ang, a ti. Hei hi samak te humhalhna kawnga state sorkar hmalakna an nih thu sawiin, thawktu lak thar te pawh training ṭha tak pek an ni dawn tih a sawi. Hna lak thar tur hi Kaziranga National Park leh a chehvela awm Nagaon, Golaghat leh Karbi Anglong District-a cheng ten an dil thei dawn a ni, Minister chuan a ti.

Minister Brahma chuan Assam chu khawvela ramsa vang tak leh hmuh tur awm zen zel lo samak ki pakhat nei tamna a nih thu sawiin, an mang mai lohna tura venhimna ṭha pek chu thil tih makmawh a nih thu a sawi. State sorkar chuan an himna turin hma a la zel dawn tih sawiin, mipuite chu sorkar hmalakna thlawp turin a sawm bawk. Hetih rual hian sapeltute chetna thleng ṭhin chu pawi a tih thu sawiin, rawng taka ramsa thah an ni ṭhin chu thil pawi tak a ni, a ti. Sapeltute chu dim an ni dawn lo tih sawiin, an chungah hremna na tak lekkawh zel a ni ang, a ti.

Assam-ah hian khawvela samak awm zawng zawnga zinga hmun thuma ṭhena hmun hnih vel chu an awm a ni.