Rose Valley Scam : CBI-in Tripura CPI-M hruaitu thuzawt fiah

Central Bureau of Investigation (CBI) chuan Tripura-a rorel lai Communist Party of India - Marxist (CPI-M) hruaitu Gautam Das chu Rose Valley scam-ah inhnamhnawiha puh zingah a tel avangin thu an zawt fiah.

Gautam Das hi Rose Valley scam-ah khan investor zingah a tel nia sawi a ni a, CBI-te chuan tun hnai khan ṭum hnih thu an zawt fiah a ni. Das chuan June 15 khan CBI Kolkata office aṭanga phone call a dawn thu leh, a tuk June 16-ah thu an zawhfiah duh thu an hrilh tih a sawi. CBI-te hian CrPC section 160 tlawhchhanin thu an zawt fiah tih a sawi a, darkar khat vel zet thu an zawt tih a sawi. Hetih rual hian Rose Valley Scam-ah hian inhnamhnawihna engmah a nei lo tih a sawi bawk. Rose Valley Scam chhuina kal zelah hian CBI official-te chuan Tripura Social Welfare Minister Bijita Nath pawh June 29 khan thu an lo zawtfiah tawh bawk a ni.

Rose Valley hnuaia sum tihchingpen hi cheng vaibelchhe 60,000 vel nia sawi a ni a, India rama lian leh sum tamna ber nia tarlan a ni. He thil chhuina kal zelah hian tun hnai khan CBI-te chuan Trinamool Congress MP Sudip Bandyopadhyay chu inhnamhnawihah puhin an lo man tawh a ni.