Nagaland-in fuel-ah Covid-19 chhiah la
Nagaland sorkar chuan petrol leh diesel aṭangin Covid-19 chhiah a la.
Nagaland state chhungah hian coronavirus kai hi awm lo mah se, sorkar chuan hri leng vanga an state sum dinhmun tlahniam avangin Covid-19 chhiah petrol-ah liter khatah Rs 5 leh, diesel leh motor spirit-ah liter khatah Rs 6 a la a ni. Assam leh Meghalaya pawhin petrol leh diesel-a chhiah lak hi an lo tisang tawh bawk.
April 28-a hriattirna a tihchhuahah, Nagaland sorkar chuan Nagaland (Sales of Petroleum and Petroleum Products including Motor Spirit and Lubricants) Taxation Act, 1967 (amended) hnuaia section 3A hnuaia sub section 3 in thuneihna a pek hmangin chhiah lakna tur hi siam a nih thu a sawi. Hei hi April 28 zanlai aṭang khan hman ṭan nghal a ni.
Chhiah lakna thar siam hi lockdown vanga an state in sum a lakluhna kawngte a tawp tak vang leh, sum lama an harsatna tawh mek phuhrukna tura hma lak a ngaih vang a ni tih sorkar chuan a sawi. Nagaland chief secretary Temjen Toy chuan sum hmuhna kawngah an state chu sorkar laipui chunga innghat a ni tih sawiin, lockdown vangin sum lamah harsatna lian tak an tawk mek tih a sawi a ni.