India ramah China bulldozer a lut lo : Indian Army

Indian Army chuan Thawhṭanni khan thuchhuah an siam a, tun hnaia China-in bulldozer hmanga Indian Army bundker-te an tichhia nia tarlan chu thu belhchiandawl lo a nih thu sawiin, India ramah an rawn luh ngai loh thu an sawi.

Tun hnai khan China chuan India, Bhutan leh China inrina, Donglong (Doklam)-a Indian Army bunnker-te an tichhia nia tarlan a ni a, mahse hei hi India chuan a pha thung a ni. June thla tir lam aṭang khan India leh China sipaite chu Sikkim leh a chheh velah an innghirngho fo a, ram pahnihte chuan ramri kana cheah an inpuh tawn a ni. Chinese Foreig Ministry chuan ramri kanin an ramah India sipaite an lut niin a sawi a, inhnukkir thuai turin a ngen bawk. India sipaite chu an inhnuhkir mai loh avangin China hian Donglong region-ah Indian bunker a tichhiatsak nia tarlan a ni. India pawhin ramri kana cheah China sipaite a puh ve bawk.

Army official chuan China-in bulldozer hmanga Indian Army bunker a tichhia anga a sawi chu thu dik lo niin a tarlang. Defence Ministry leh External Affairs Ministry-te pawhin hei hi thudik lo a nih thu an sawi. Hetih rual hian External Affairs Ministry chuan India sipai-te'n Sikkim sector-a India-China border an paltlang thu sawiin, China ram chhung an lut tih a sawi. Hei hi China sipai, People’s Liberation Army (PLA)-te'n Donglong area-a inkalpawhna kawngpui sial an tum dan tuma chetna a nih thu a tarlang. China hian June 16 khan Donglong-ah hian a sipaite tirin inkalpawhna kawngpui sial an tum a, hei hi India leh Bhutan-te chuan an duh loh thu an sawi. Royal Bhutan Army-te chu June 20 khan he lai hmunah hian an patrol a, China sipaite chettlat dan an thli thlai a ni. Bhutan chuan China chetdan hi a dem thu sawiin, Donglong region-a inkalpawhna kawngpui a sial chu kum 1988 leh 1998-a inremna lo siam tawh bawhchhiatna a nih thu a sawi.

Ramri fel tak siam a ni : China

China chuan Sikkim sector-a Sino-India border-ah ramri fel tak siam a nih tawh thu Thawhṭanni khan a sawi a, India sipaite chetdan chu inremna kalh a nih thu a tarlang. Chinese foreign ministry thupuangtu Geng Shuang chuan, "India Prime Minister hlui Jawaharlal Nehru-a hun lai khan Sikkim-ah hian 'Sino-British Treaty' neih a lo ni tawh a, he hunah hian ramriah inremna siam a ni", a ti. He inremna hi India pawhin a pawm niin a sawi bawk. Geng Shuang chuan India chuan inremna lo siam tawh hi a zah tur a ni a, Donglong region-a a sipai te pawh a hnukkir thuai tur a ni, a ti. Sikkim Sector-ah hian India-China boundary fel tak siam a ni a, chuvangin tuna Indian Army-te chetdan hi inremna lo siam tawh bawhchhiatna a ni, a ti bawk.

Hetih lai hian Beijing-a chanchinbu pakhat Global Times chuan India chu U.S ṭanpuina dilah a puh. Global Times hian tun hnaia Prime Minister Narendra Modi-a'n US a tlawh ṭum khan ralthuam lama thawk dun turin Donald Trumo chu inremna siampui leh, China laka himna tur kawnga dapah a puh a ni. Ram pahnite hian ralthuam lamah inremna an siam a, hei hi U.S tan ni lo India-in ama hamṭhatna atana ti a nih thu leh, Indo-Pacific region-a China lian zel tur ven a tumna niin a sawi. Modi hian June 25-27 chhung khan U.S a tlawh a, 22 Guardian MQ-9B drone lei turin President Donald Trump chu inremna a siam pui a ni.