Hmarchhakah tuilian leh leimin avangin harsatna thleng mek

Tun hnaiah ruah a sur nasat avangin hmarchhak hmun hrang hrangah tui lianin harsan a thlen mek a, nunna chan leh chenna-in chhuahsan mi eng emaw zat an awm tawh. Assam, Manipur leh Aruanchal Pradesh-te chuan tuilian hi an tuar mek a ni.

Arunachal-ah chuan an khawpui Itanagar-ah tuilian avanga harsatna tawk an tam ber a, leimin avanga kawngpui chhia a awm bawk avangin inkalpawhna pawh a buai phah hle. Itanagar-ah hian lei eng emaw zat chu tuilianin a lak avangin harsatna thleng mek a ni. Siang river chu hlauhawm chhinchhiahna chung lamah a luang a, hei hi East Siang District leh a chheh vela chengte tan a hlauhawm thei dawn a ni. Pasighat-ah pawh tuilian avang hian mi eng emaw zatin an chenna in leh lo an chhuahsan a, hmun him lamah sawnchhuah an ni. Itanagar - Naharlagun inkarah lei a min avang lirthei eng chi mah a kaltalng thei lo a, a siamṭhat hna thawh nghal a ni. Chhiatna hrang hrang thleng avang hian thi leh hliam erawh an awm lo nia tarlan a ni.

Assam-ah chuan tuilian vanga harsatna tawk hi mi eng emaw zat an la awm a, tun kar tir lam kha chuan tuilian tuar hi nuai hnih an chuang tawh a ni.

District pariat-a khaw 453 vel chuan tuilian vang hian harsatna an tawk a, chhanchhuah hna thawh mek zel a ni. Assam State Disaster Management Authority (ASDMA) chuan Barpeta, Lakhimpur, Jorhat, Karimganj, Cachar, Dhemaji, Karbi Anglong leh Biswanath district-te chu tuilian avanga harsatna tawk nasa zual an nih thu tarlangin heng hmuna cheng mi tam tak chuan himna zawngin an in leh lo an chhuahsan tih an tarlang. ASDMA chuan Karimganj district chu a tuar nasa ber niin an tarlang a, mi nuai 1.53 velin harsatna an tawk a ni. Lakhimpur district-ah pawh tuilian tuar hi mi 76,000 vel an awm bawk.

Tuilian avanga harsatna tawkte hi relief camp hrang hrangah dah an ni a, mi 5,670 vel chu relief camp 269-ah dah an ni. Thlai chinna hmun ram hectare 5,272 vel zeta zau chu tui lian hian a chim tawh bawk a, hei hian chhungkaw tam tak eizawnna a nghawng a ni. Jorhat, Karimganj, Karbi Anglong, Sonitpur leh Cachar district-ah hian chenna tur nei lo mi 4,000 vel zet an awm nia tarlan a ni a, relief camp siamah an leng lo a ni. Tuilian avang hian hmun tam takah inkalpawhna leh inbiak pawhna a buai phah a, ei leh bar lakkhawm kawngah pawh harsatna a thleng chho mek a ni.

Assam-ah hian Thawhṭanni khan naupang kum ruk mi chu leiminin a hnawl avangin a thi a ni. Police-te chuan Dipika Barman hi a school kal kawngah leimin hian a hnawl tih an sawi a, a chhungte leh a bul hnaia awmten an lakchhuah hnuah hospital panpui a ni a, mahse a lo thi hman tawh tih an sawi. Tun hnaia ruah sur a vangin hmun tam takah lei a min nasa hle tih an sawi a, mipuite chu fimkhur turin an chah. State sorkar chuan Guwahati leh a chhehvel chu leimin thlen hlauhawmna hmun a nih thu a tarlang bawk.

Manipur-ah pawh lui eng emaw zat chu hlauhawm chinchhiahna chungah an luang a, mi tam tak chu hmun him lamah thiar chhuah an ni. Irrigation and Flood Control Minister Lepao Haokip chuan tuilian avanga harsatna thlenna hmun hrang hrangte a tlawh kual a, ṭanpuina awm thei angte ngaihtuah sak an nih tur thu a sawi. Tuilian avang hian Uripok, Sagolband, Lamphel, Naoremthong, Iroishemba, Keishamthong leh Mayai Lambi-ahte chhungkaw eng emaw zatin an chenna-in an chhuahsan tawh a, harsatna tawk mek hi mi sang chuang an awm a ni. Uripok, Sagolband, Wahengbam Leikai, Paona Keithel, Tera leh Sayang panna kawngpui te chu tuilianin a chim avangin lirthei che vel a buai phah hle.

Valley district - Imphal West, Imphal East, Thoubal, Kakching leh Bishenpur district-te chuan tuilian avang hian harsatna an tawk nasa zual a ni. Sorkar mi pawimawhte leh Irrigation and Flood Control Department lama thawktute chuan chhiatna thlenna hmun hrang hrang an tlawh a, a ṭul angin chhawmdawl hna an thawk a ni.

Hmarchhak hmun hrang hrangah June thla tir lam aṭang khan ruah a sur nasa hle a, hei hian hmun tam takah chhiatna a thlen tawh a ni. Leimin, tuilian, leh saberekakhuangkaih avangin nunna chan eng emaw zat an awm tawh a, hliam tuar leh chenna-in nei lo mi eng emaw zat an awm bawk. Assam leh Mizoram chu chhiatna theng avanga nunna chan tamna niin, state dangah pawh nunna chan hi an awm bawk.