Assam-ah tuilianin zual lam a pan

Assam-a tuilian chuan zual lam a pan mek zel nia tarlan a ni a, nunna chan pawh an punbelh.

Assam State Disaster Manage-ment Authority (ASDMA)-in a tarlan danin tui lian avanga harsatna tawk mek hi mi nuai thum an chuang tawh a ni. Kartir lam khan tuilian tuar hi mi nuai hnih vel an ni a, tunah chuan nuai 3.8 vel an tling chho tawh a ni. Tuilian hian Dsitrict 13 zet tan harsatna a thlen tawh a, mi tam tak chu hmun him lamah sawn chhuah an ni. Lakhimpur, Jorhat, Golaghat, Cachar, Dhemaji, Biswanath, Karimganj, Sonitpur, Hojai, Majuli, Barpeta, Nagaon leh Nalbari district-a khaw 834 chu tuilian hian a chimpil tawh niin ASDMA chuan a tarlang. Karimganj district chu a tuar nasa ber niin, mi nuai hnih an chuang tawh a, Lakhimpur-ah pawh tuilian tuar hi mi 77,800 vel an awm a ni.

ASDMA chuan tui ian hian thlai chinna hmun ram hectare 19,000 vel zeta zau a chim tawh tih an sawi a, hei hian mi tam tak eizawnna a nghawng dawn tih an sawi. Hmun hrang hranga relief camp siamah mi 24,675 vel an khawsa mek a, harsatna tawkte ṭanpuina tur distribution centre eng emaw zat siam a ni tawh bawk. Barpeta, Biswanath, Golaghat, Cachar, Karimganj, Mori­gaon, Baksa leh Nalbari-ahte tuilian hian lei a lak avangin inkalpawhna buai phah hle nia tarlana ni bawk.

Assam-a lui lian ber Brahma-putra chu Nimatighat leh Tezpur-ahte hlauhawm chhin­chhiahna chungah a luang tawh a, helai hmuna chengte hi inral­ring tura hriattir an ni. Brahmaputra bakah hian Dikhow, Dhansiri, Jia Bharali, Barak leh Kushiyara lui te pawh an lian mek a, hei hian harsatna hi a belhchhah a ni. Inland Water Transport Director Bharat Bhushan Choudhury chuan, Brahmaputra lui hmanga inkalpawhna reng reng chu tuilian avang hian tiamchin awm loin khar a nih thu a sawi. Guwahati-a ferry service-te pawh tihtawp an nih thu sawiin, hei hi mipuite himna tura hmalakna nih thu a sawi.

Assam-ah hian tuilian avanga nunna chan pawh an pung chho zel a, kumin bikah mi 17 an thi tawh a ni. Thawhlehni khan Hojai district-ah tuilianin mi pakhat a la leh a, a hnuah a ruang hi lakchhuah a ni. Nunna chan hi Mahendra Dekaraja (47) a nih thu tarlan a ni.

Hetih lai hian hmar­chhak state dang Aru­nachal Pradesh leh Manipur-te pawhin tuilian avang hian harsatna an tawk mek. Arunachal Pradesh Chief Minister Pema Khandu chuan tuilian avanga chhiatna nasa zawk a thlen lohna turin mipuite chu fimkhur turin a chah. Khandu chuan tun hnaiah ruah nasa tak a sur avangin hmun tam takah lei min leh tuilian a thleng mek a, hemi laka him tur hian state sorkar chuan hma a la mek tih a sawi. West Siang district leh Upper Subansiri district-ahte inkalpawhna leh inbiakpawhna kawngah harsatna a thleng mek tih tarlan a ni bawk. Manipur-ah pawhin tuilian leh leimin vangin harsatna an tawk mek a ni.