IAF Helicopter tla AP-ah hmuh a ni

Indian Air Force (IAF) helicopter tla chu Arunachal Pradesh-a Papum Pare district-ah hmuh a ni.

Advanced Light Helicopter (ALH) hi tun hnaia ruahsur nasa tak avanga leimin leh tuilian tuarte chhawmdawl hna thawka a thlawk chhuak chu Thawh­lehni aṭang khan a chin hriat lohin a awm a, a tla tih hriat zui a ni. Rescue team-te chuan a zawn hna hi ngawrh takin an thawk nghal a, Nilaini khan Papum Pare district-a ram hnuaiah hmuh a ni ta a ni. Helicopter-ah hian a thawktu mi pathum an chuang a, an chin hriat a ni lo. Helicopter hi Thawhlehni tlai dar 3:45 khan Pilputu Helipad aṭangin a thlawk chhuak a, chin hriat lohin a a awm zui a ni.

Papum Pare district official-te chuan Helicopter hian Sagalee biala cheng harsatna tawkte ṭanpui hna a thawk a, vanduaina hi a tawk ta tih an tarlang.

Chief Minister Pema Khan­du chuan vanduaina tawkte chhawmdawl hna thawktuten chhiatna an tawk chu pawi a tih thu sawiin, vanduaina tawkte chu a tawrhpui thu a sawi. Khandu chuan Sagalee leh Dambuk-a leimin leh harsatna tawk te hi helicopter hmang hian hmun him lamah sawn an ni a, mi 169 chu sawn chhuah hman an nih thu a sawi. Indian Air Force-te hnathawh chu ropui a tih thu sawiin, state sorkar chuan kawng hrang hrangah an hnathawh a thlawp zel tur thu a sawi bawk.

IAF offical-te chuan helicopter hi Sopo Yuha-a kawr chhengchhe takah a tlak thu sawiin, lak chhuah tuma hma lak mek a ni, an ti. A tlakna hi Itanagar aṭanga km 30 vela hla a ni. Inspector General of Police, Law and Order chuan helicopter tlakna hi tlawhpawh a harsat avangin a lakchhuahna hi thawh a harsat thu a sawi. Defence thupuangtu Lt Col Sombit Ghosh pawhin a tlakna hi hriat ni tawh mah se tlawhpawh a harsat avangin chanchin kimchang hriat a la nih loh thu a sawi.

Helicopter-ah hian Wing Commander MS Dhillon, Flight Lieutenant PK Singh leh Flight Engineer Sergeant Gujjar-te an chuang a, an thi nge an dam finfiah a la ni lo. Commander MS Dhillon chuan a khalh a, an tlak chhan erawh hriat a la ni lo.