Chamling-a'n Siliguri-a Sikkim lirthei beih dem
Sikkim Chief Minister Pawan Chamling chuan West Bengal, Silliguri-a Sikkim lirthei ten beih an tawk chu a dem thu sawiin, West Bangla sorkar chu hma la tura a phut thu a sawi.
Silliguri-ah hian Sikkim register lirthei eng emaw zat chuan beih an tawk a, hei hi Sikkim sorkarin West Bengal aṭanga inlak hran duh pawl Gorkha Janmukti Morcha (GJM)-te a thlawp vang nia ngaih a ni. Sikkim Chinef Minister Pawan Chamling chuan GJM-te'n state hran pek phuta West Bangla sorkar laka lungawi lohna an lantir chu a thlawp thu a lo sawi tawh a ni. Hetih lai hian kar kalta chhung khan Sikkim pana tlan lirthei eng emaw zat chuan Siliguri-ah beih an tawk a, a bikin Sikkmi sorkar hnuaia lirthei in register-te chuan beih an tawk nasa zual a ni. Bungraw phur truck eng emaw zat chuan Sikkim panna kawng National Highway 10-ah beih an tawk a, he thil thleng duh lohna lantir hian truck driver-te chuan nawrh an lo huaihawt tawh bawk.
Chief Minister Chamling chuan NH-10 chu an chakkhai lamna kawngpui ber a nih avangin helai hmuna tlan lirthei te an him theihna turin sorkar laipui leh West Bengal sorkar-te chu hma la turin a phut tih a sawi. Siliguri leh a chheh velah lirthei suasam leh rawk a hluar hle tih sawiin, he hi a pawi takzet a, tihtawp thuai a nih loh chuan harsatna lian zawk a thlen theih thu a sawi. Silliguri-ah hian anti-social activiest inti te chuan lirthei hi an bei ṭhin tih a sawi. Hetih rual hian mipuite chu chiai lo tura a duh thu sawiin, harsatna hi chingfel turin hma lak mek a nih thu Chamling chuan a sawi bawk.