Manipur-ah Ganja vbch hnih hu man
Manipur police-te chuan Nilaini khan Imphal-ah Ganja ṭhahnem tak an man a, hei hi International Market-ah chuan cheng vaibelchhe hnih hu vel nia tarlan a ni.
Imphal East District Police Superintendent K. Kabib chuan heng Ganja-te hi truck-ah man a nih thu sawiin, he thilah hian thubuai ziahluh nghal a nih thu a sawi. Ganja hi a vaiin kg 1600 vel zet a ni a, truck driver Mohammad Imran Khan pawh man nghal a ni. Tun hnai khan Meghalaya police-te chuan Shillong-ah Ganja cheng vaibelchhe hnih chuang man hu an lo man tawh bawk a ni. Police-te chuan hmarchhak hmun hrang hrangah ruihhlo tawlhruk a hluar hle tih an sawi a, hengte hi ṭhenawm ram Bangladesh aṭanga ramri kana lakluh a nih thu an sawi, Ruihhlo bakah hian ramri kana ramthuam tawlhrukna a hluar thu an sawi bawk.