Assam : Tuilianin ziaawm lam pan thei lo ACM-in review meeting a ko

Assam-a district 15 chuan tuilian avangin harsatna an la tawk mek a, Chief Minister Sarbananda Sonowal chuan hemi chungchang ngaihtuah hian review meeting a ko.

District 15-a mi nuai li chuang chuan tuilian hi an tuar mek a, an la pun chhoh theih thu tarlan a ni. Assam-ah hian June thla tir lam aṭanga khan tuilian avangin mi tam takin harsatna an tawk ṭan a, ziaawm lam pan loin harsatna tawk hi an pung zel zawk a ni. Hemi chungchang ngaihtuah hian chief minister chuan Revenue and Disaster Management Department leh district hrang hrang-a thuneitute chu Ningani khan meeting a neihpui a, hmalak zel dan tur an sawiho a ni. CM Sonowal chuan tuilian avanga nunna chan an awm belh zel loh nan leh, harsatna tawk mekte chhawmdawl hna chu chhun zan zawma thawh a ngaih thu a sawi. Chhungkaw eng emaw zat chu hmun him lamah sawn chhuah tawh an ni a, midang eng emaw zata hmun him lama sawnchhuah ngai an la awm tih a sawi bawk.

Sonowal chuan MP leh MLA-te chu an bial chhunga harsatna tawkte thlamuan tur leh a chak zawka chhanchhuah hna thawh a nih theih nana hma la tura a hriatttir tawh thu a sawi. Hmun hrang hranga relief camp siam a nih tawh thu sawiin, heng hmunah te hian tui in tur, ei tur leh damdawi te sem chhuah a nih thu a sawi. Revenue and Disaster Management Department hna thawh chu fakawm a tih thu sawiin, hnathawktute inpekna avangin mi tam tak nunna chhanchhuah a nih thu a sawi. Chhanchhuah hna chu chhun zan zawma thawh mek reng a ni a ti a, mipuite chu chiai lo turin a ngen. Chief Minister chuan tuilian avanga nunna chan tawh mi 19 chhungte chu darkar 48 ral hmain zángnadawmna pek an nih tur thu a sawi bawk.

Tuilian avang hian ramsa leh ranvulh eng emaw zat an thi tawh a, Animal Husbandry and Veterinary Department chuan an himna turin hna an thawk ve mek bawk. Agriculture Department chuan thlai chingtute harsatna tawh chu a namai lo hle tih an sawi a, thlai chinna hmun ram zau tak chu tuilian hian a chimpil tawh tih an sawi. Thlai chinna hmun ram hectare 16,000 vel zet chu tuilian hian a chim tawh nia tarlan a ni a, revenue circle 47 huamchhunga thlai chingtute chuan harsatna hi an tawk nasa zual a ni.

State sorkar chuan chenna-in nei lo mi 3,94,000 tan relief camp 128 a siam tawh a, chenna nei lo mi eng emaw zat an la awm bawk. Assam-a lui lian ber Brahmaputra chu hmun tam takah hlauhawm chhinchhiahna chungah a luang tawh a, Dikhow Dhansiri, Jia Bharali, Beki leh Kushiyara-te pawhin hmun tam takah hlauhawm chhinchhiahna an pel tawh a ni. District hrang hranga khaw 800 vel zet chu tuilian hian a chim tawh a, mi tam takin himna zawngin an in leh lo an kalsan tawh a ni. Disaster Management Authority (ASDMA) chuan Barpeta, Lakhimpur, Jorhat, Karimganj, Cachar, Dhemaji, Karbi Anglong leh Biswanath district-te chu tui lian avanga harsatna tawk nasa zual an nih thu a tarlang. ASDMA chuan heng district-a tuilian tuar chu mi nuai li chuang an tling tawh a, Karimganj district chu a tuar nasa ber niin an tarlang.

Tuilian hi Lakhimpur, Jorhat, Golaghat, Sivasagar, Cachar, Dhemaji, Biswanath, Karimganj, Sonitpur, Hojai, Majuli, Barpeta, Chirang, Nagaon leh Nalbari-te chuan an tuar nasa zual a, heng hmuna cheng chhungkaw tam tak chu chenna tur nei loin an awm mek a ni.Tuilian avanga thi zat pawh 24 an tling tawh nia tarlan a ni. Nalbari district-ah chuan State Disaster Response Force (SDRF) chuan zirlai 400 vel zet chu hmun himah an sawn chhuak tawh a ni.

Tuilianin Pobitora Wildlife Sanctuary a chimpil

Central Assam-a awm Pobitora Wildlife Sanctuary chu tuilian hian a chimpil vek tawh niin forest department official-te chuan an tarlang. Brahmaputra lui lian chuan Pobitora Wildlife Sanctuary hi a chimpil tawh a, sanctuary-ah hian ramsa cheng an ṭhahnem hle a, samak pawh ṭhahnem tak an awm tih an tarlang. Ramsa eng emaw zat an thi tawh tih an sawi a, eng emaw zat chu hmun him lamah sawn an nih thu an sawi. Divisional Forest Officer, Guwahati Wildlife Division, P Boruah chuan Great Indian One-Horn Rhinoceros-te chu hmun sang zawkah an himna tura sawn an nih thu a sawi. Tuilian hian Sanctuary panna National Highway pawh a chim a, ramsa ei tur chaw pawh lakluh a harsat phah hle. Pobitora Wildlife Sanctuary hi sq km 38.8 vel zeta zau a ni a, Brahmaputra lui kama a awm a ni. He lai hmunah hian samak 100 vel leh, ramsa dang sang eng emaw zat an cheng a ni.

Kaziranga National Park huam chhunga hmun hniam lam chu tuilian hian a chimpil tawh tih tarlan a ni bawk a, nikum lama chhiatna nasa taka ang kha a thlen leh a hlauhthawnawm niin Park offical-te chuan an sawi. Kum 2016 khan KNP ram zawng zawng deuh thaw chu tuilian hian a chim a, a ram 80% zet chu tui hian a chim a ni. Ramsa eng emaw zat an thi a, heng zingah hian ramsa note pawh eng emaw zat an tel a ni.