Ram Nath Kovind-an hmarchhak a tlawh

8th July, 2017

Bharatiya Janata Party (BJP) kaihhruai NDA presidential candidate chuan hmarchak hmun hrangah campaign a nei a, Ningani khan Arunachal Pradesh a thleng.

Ram Nath Kovind hi Union Ministers Raj Narendra Singh Tomar leh Kiren Rijiju bakah, BJP national general secretary Ram Madhav, Lok Sabha MP Ram Vichar Nittam leh North East Democratic Alliance (NEDA) convenor Himata Biswa Sharmate'n an ṭawiawm a ni. Kovind chuan hmarchhak hmasawnna chu sorkar laipui ngaihpawimawh hmasak ber pakhat a nih thu a sawi. Arunachal Pradesh chu nasa takin hma a sawn tih sawiin, Chief Minister Pema Khandu-a kaihhruai sorkar-ah mipuiten rinna an nghat ngam chu lawmawm a tih thu sawiin, hmasawnna duhawm tak hmuh tur a awm chho mek zel a ni, a ti.

Kovind hian People Party of Arunachal (PPA) hruaitute meeting a neihpui a, North East Democratic Alliance (NEDA) hruaitute a kawm bawk.

Chief Minister Pema Khandu chuan Kovind chu an thlawp tur thu sawiin, president a nih ngei theih nan duhsakna a hlan. People’s Party of Arunachal (PPA) chuan Ram Nath Kovind hi an thlawp tur thu an tichiang tawh a, MLA pakua an nei. PPA President Kameng Ringu chuan, meeting an neih hnuah an thlawp tur thu hi a puang a, Presidential election neih hunah an vote ngei dawn tih a sawi. Anni bakah hian BJP leh party dangte pawhin an thlawp dawn nia tarlan a ni bawk. Arunachal-ah hian rorel lai BJP chuan member 47 an nei a, NDA preisdential candidate hi an thlawp vek a rinawm bawk.

Kovind hian nimin khan Congress sorkarna Meghalaya a tlawh bawk. Meghalaya-ah hian opposition party Hill State Democratic People’s Party (HSPDP) chuan Kovind hi an thlawp tur thu an puang a, MLA pali an nei a ni. HSPDP chief Ardent Miller Basaiawmoit chuan an thlawp tur thu hi a puang a ni. HSPDP bakah hian United Democratic Party (UDP) chuan NDA candidate hi an thlawp tur thu an puang ve bawk. UDP hian MLA pariat an nei a ni. Hetih lai hian rorellai Meghalaya United Alliance chuan member 44 an nei a, Congress chuan party malin MLA 30 an nei a ni a, Kovind hi an thlawp dawn lo thung.

Ram Nath Kovind hian Assam leh Manipur-te a lo tlawh tawh bawk a, campaign beihpui a thlak mek a ni. Heng state pahnihte hi BJP kaihhruai sorkar dinna a ni a, Arunachal Pardesh pawh BJP sorkarna tho a ni.