Tripura : IPFT-in state hran phutin nawrh huaihawt tum

Tripura-a rorellai, BJP thawhpui Indigenous People's Front of Tripura (IPFT) chuan August 23 hian Tripura aṭanga Tipraland state hran siam phutin Delhi-ah nawrh huaihawt an tum.

IPFT hian hun rei tak Tripura Tribal Areas Autonomous District Council huam chin chu state hrana siam an lo phut tawh a ni.

Party hotu leh Tripura-a BJP kaihhruai ṭangrual sorkara forest minister NC Debbarma chuan, August 23-ah an party hian Delhi Abhiyan an buatsaih dawn a, he programme peng pakhatah hian Delhi-a Jantar Mantar-ah party hruaitute chuan state hran phutin nawrh hi an huaihawt dawn tih a sawi. He hun hmang tur hian August 18-ah Delhi an pan ang.

Debbarma chuan Tripura-a BJP kaihhruai ṭangrual sorkar a din hnuah state hran an phut chungchangah union home minister chuan high power committee pawh a lo din tawh a, stakeholder-te pawh meeting a lo neihpui tawh ṭhin tih a sawi. Mahse tun thlengin an thil phut chungchangah hmasawnna a la awm lo a ni tiin, 'Prime minister, home minister, defence minister, BJP national president leh hruaitu dangte pawh vawi tam tak meeting kan neihpui tawh a ni," a ti.