Meghalaya assembly inthlanah NPP in party dang thawhpui tum lo

Meghalaya state-a rorellai, National People's Party (NPP) chuan nakkum state assembly inthlan neih turah an party chuan party dang thawhpui loin an mal din dawn tih a sawi.

Party hotu leh Meghalaya chief minister Conrad K Sangma chuan, "Keimahni pual ngeiin inthlan hi kan chuh ṭhin. State dangah pawh inthlan hmain party dang nena thawhdunna tur kan siam lawk ngai lo. Kan state-ah pawh policy hran kan nei dawn lo a, hei hi kan kaldan phung a ni. Inthlanah NPP hian a mal beih ṭhin a ni," a ti.

International Youth Day-a Empowered Youth Organisations (YESS) hmalaknaa youth group ṭhenkhat hnena sum lama chhawmdawlna a semnaah Chief Minister chuan hei hi a sawi a ni. Group 61 hnenah Rs nuai 30 vel an sem chhuak a ni. Ṭhalai zinga hnathawh nei lo, unemployment rate sang zel chungchang chinfelna tur chu entrepreneurship a nih thu CM chuan a sawi bawk. "Thalaiten mahni kut kea din duhna an neih loh chuan, unemployment vanga buaina hi chinfel a ni thei lo ang," tiin a sawi.

Meghalaya-a kaihhruai sorkar chuan entrepeneur-te puihna turin programme lian tak, 'Prime Meghalaya' a buatsaih thu sawiin, hei hian state chhunga entrepreneur-te inkarah inelna ṭha tak a siam a ni, a ti. A chakte chu sum lama puiin, loan-te an pe a, sumdawng lian zawkte nena an inthlunzawm theih dan turte pawh an ngaihtuahpui tih a sawi bawk.