Assam : Tuilianin ziaawm lam a pan

Assam-a tuilian chuan ziaawm lam a pan nia tarlan a ni a, tuilian tuar hi mi nuai 3.83 vel an la tling. Kar kalta tawp lam khan tuilian vanga harsatna tawk hi mi nuai 4.26 vel an tling a, hei hi zawi zawiin a tlahniam niin Assam State Disaster Management Authority (ASDMA) chua an tarlang. Hetih lai hian kar kalta chhung khan electric kalsualin mi panga a man hlum a ni.

ASDMA chuan tuilian tuar hi district 16 an la awm tih sawiin, ruah a sur belh tawh loh chuan a ziaawm lam a pan zel an beisei thu an sawi. Lakhimpur, Bongaigaon, Jorhat, Golaghat, Cachar, Dhemaji, Biswanath, Karimganj, Sonitpur, Majuli, Barpeta, Nagaon, Nalbari, Sivasagar, Morigaon leh Chirang district-te chuan tuilian hi an la tuar mek a, mi tam tak chu hmun himah sawn an ni. Tun ṭuma tuilian hian district hrang hranga khaw 932 zet chu a chimpil tawh a, thlai chinna hmun ram hectare 30,000 vel a chimpil tawh bawk. Karimganj leh Lakhimpur chu a tuar nasa ber an ni.

Chenna tur nei lo tan relief camp 188 siam a ni tawh a, district 10-ah distribution centre siam a ni tawh bawk. Heng relief camp-ahte hian mi 16,705 vel an khawsa mek a, kawngpui kam leh lei remchang laia riak chhungkhaw eng emaw zat an awm bawk. Assam-a lui lian ber Brahmaputra chu hlauhawm chhinchhiahna chungah a la luang a, hei hian Jorhat, Tezpur, Goalpara leh Dhubri pawh a nghawng pha mai thei tih tarlan a ni. State sorkar chuan harsatna tawkte chawmdawl hna ngawrh takin a thawk zui zel a, Rescue Team leh chhanchhuahna thawktu pawl hrang hrangte chuan chhun zan zawmin hna an thawk a, ei tur leh tui intur thianghlimte sem chhuah reng a ni bawk.

Ni 2 chhungin elctric-in mi panga man hlum :

Assam-a tuilian hian chhiatna a thlen nasa hle a, electric ban eng emaw zat chu tui hian a len thlu tawh a, kar kalta nihnih chhung khan current man avangin mi panga an thi a ni. Power department thuchhuah chuan elctric hrui eng emaw zat chu tui-ah a inchiah tih an sawi a, hei hi mihring tan a hlauhawm hle tih an sawi. Tunhnaia electric mana thi zingah hian zirlai pathum an tel a, he thil thleng hi pawi an tih thu Power department chuan an sawi a, mipuite chu fimkhur tur leh chiai lo turin an chah bawk. Lakhimpur district-a cheng College zirlai Dharitri Deka-i chu kar kalta Zirtawpni khan electric hian a man hlum a, mobile tower operator Mantu Bora leh pawl hnih zirlai Bidyut Das-te chuan Zirtawpni vek khan nunna an chan a ni. Kar liamta Ningani khan Nagaon district-ah nunna chan pahnih an awm bawk a, pakhat hi zirlai niin, kum 12 mi a ni.

All Assam Students’ Union (AASU) chuan thuchhuah siamin ni hnih lek chhunga electric man avanga nunna chan mi panga lai an awm chu pawi an tih thu sawiin, thi zinga zirlai pathum ngawt an tel chu lungchhiat thlak an tih thu an sawi. He thil thleng hi chhuizui an phut thu sawiin, mawhphurtu Power department-a thawkte chu hrem an phut thu AASU chuan an sawi bawk. He thil thleng hi mi tam takin an dem thu an sawi a, Power Department-a thawktute chu hremna pek an phut bakah, Power Minister Pallab Lochan Das chu bang turin an nawr ve bawk.

Minister-te'n harsatna tawkte an tlawh :

Assam Chief Minister Sarbananda Sonowal chuan kar kalta Zirtawpni khan minister pariat-te chu tuiliana vanga harsatna tawk mekte thlamuan tur leh thil awmdan endik turin a ngen a, minister-te hian hmun hrang hranga harsatna tawkte an tlawh kual a ni. Chief Minister kaihhruaina hnuaiah tuilian avanga harsatna tawk mekte chhawmdawlna tur ngaihtuahin meeting neih a ni a, chhanchhuah hna chak zawka kalpui dan tur te, chenna nei lo te tana relief camp tam zawk sak te an rel a ni. Sonowal chuan minister-te chu hmun hrang hranga harsatna tawkte ṭanpui tura an thawhchhuah thu sawiin MLA-te pawh an bial chhunga harsatna tawkte tana an chet chhuah thu a sawi.

Assam-ah hian tunhnaiah mi eng emaw zat an thih belh avangin tuilian leh a kaihhawih chhiatna thlenga thi zat hi mi 22 an tling tawh a ni. Tuilian hi June thla tir lam aṭanga inṭan kha a ni a, tun thlengin harsatna tawk mi nuai chuang fe an la awm reng a ni.