Manipur-in tuilian tuar mek
Manipur hmun hrang hrangah hun eng emaw chen tuilian avangin harsatna a thleng tawh a, an harsatna tawh mek hian zual lam a pan nia tarlan a ni.
Lui lian eng emaw zat chuan hmun tam takah hlauhawm chhinchhiahna an pel a, hei hian chhiatna nasa zawk a thlen theih thu tarlan a ni. Chief Minister N. Biren Singh chuan tuilian tuarte hi chhawmdawlna pek an nih tur thu kar kalta Inrinni khan a puang. Tuilian hian khaw eng emaw zat chu a chim tawh a, heng hmuna cheng mi tam tak chu hmun himah sawn chhuah tawh an ni, a ti. Hetih rual hian tuilian vanga harsatna thleng mek endik tur hian sorkar laipui aṭangin endik tur tirh an la nih loh thu a sawi bawk.
Oil Tanker Drivers’ Union-te chuan Inrinni khan hmun ṭhenkhatah relief material semchhuah hna an thawk a, tlawmngai pawl eng emaw zatin an pui ve bawk. Thongju assembly constituency huamchhungah harsatna tawk hi an tam ber a, Singjamei-Kongba inkalpawhna pawh khar lailawk a ni. Bishnupur district-a hmun tam tak pawh tuilian hian a chim tawh tih tarlan a ni. Tuilian hian sangha dil leh thlai chinna hmun eng emaw zat a chim tawh bawk a, thlai chingtu chhungkaw 100 chuangin harsatna an tawk a ni. Chief Minister N. Biren Singh chuan thlai chingtute hi chhawmdawlna pek an nih tur thu a sawi a, an huan enkawlna senso tumsak an nih tur thu a sawi.
Hetih lai hian Nagaland-ah pawh ruah sur nasa tak avangin hmun tam takah lei a min a, hei hian inkalpawhna tibuai nasa hle. Khaw eng emaw zat chu tlawhpawh theih loin an awm a, heng hmuna cheng mi 15,000 vel zet chuan harsatna nasa zawk an tawh theih thu tarlan a ni. District Disaster Management leh PWD Department-te chuan kawngpui thenfai hna hi an thawk a, a tlang hun tur erawh hriat ala ni lo. Ni 11 chhung zet lirthei a tlan tawh loh avangin, Japu, Changdang, Lakhuni, Alongtaki Nokpu, Saring, Longchem, Lirmen, Yajang A, Yajang B, Yajang C leh Yajang Model khua te chuan nitin mamawh lakkhawm kawngah harsatna an tawk mek a ni.