Assam CM-in national flag zahna lantir zel turin ngen ; State sorkarin thubuai nuai khat a sût dawn

Assam chief minister Himanta Biswa Sarma chuan Independence Day a zawh hnuah pawh, national flag zahna chu lantir chhunzawm zel turin state mipuite a ngen.

Chief Minister Sarma chuan, "India ram zalenna champha vawi 75-na lawmna, Azadi ka Amrit Mahotsav hnuaiah Assam mipuite chuan ram hmangaihna lantirin, ni thum chhung hnam puanzar an zar a ni. Heng hnam puanzarte hi Independence Day a zawh hnuah pawh kawtthlerahte paih mai lo a, zahna lantir chhunzawm zel hi mitin mawhphurhna a ni. In lamah zah takin vawng zui zel ang che u," a ti.

Har Ghar Tiranga campaign-na hnuaiha state chhunga self-help group-ten natoinal flag hi nuai 42 vel hralhin, flag hralhna aṭanga sum hmuh hi cheng vaibelchhe 17 vel a tlin thu a sawi bawk.

CM hian nimin khan Guwahati-a Shraddhanjali Kanan Park-ah Assam tana martarte zahna a hlan nghal bawk. Shraddhanjali Kanan hi Guwahati-a park lar tak a ni. RG Baruah Road-a Assam State Zoo epah a awm a ni. Kum 2010, October 11 khan khatih laia Assam chief minister Tarun Gogoi-a'n a hawng a ni.

Guwahati-a Independence Day lawmnaa thu a sawiah, Assam Chief Minister chuan state sorkar chuan thubuai tenau awm mek, 'minor case' nuai khat a sut dawn tih a sawi. Heng zingah hian social media post chungchang avanga thubuai siam eng emaw zat a tel.

Assam-ah hian thubuai tihkhawtlai mek hi nuai li vel zet a awm. Sarma chuan, "Thubuai nuai khata a lo tlem phah chuan, judiciary lam chuan thubuai lian tham, pawngsual, tualthah leh thubuai dangte an thlurbing thei dawn a ni," a ti.