Nagaland-a helhoin an beihnaah AR sipai 2 an hliam

Nagaland-a Mon district-ah nimin zing khan helhoin an beihnaah Assam Rifles sipai pahnih an hliam a, helicopter-in Jorhat, Assam-a sipai damdawi-in panpui nghal an ni. Pakhat zawk chu a dinhmun a ṭha lo hle.

He pawikhawihna thlenna hi Nyasa khua niin, zing dar 2.35 vela thleng a ni. Sipai beitute hi National Socialist Council of Nagaland (NSCN-K-YA) nia hriat an ni a, sipaite hian bei let ve nghalin hel zingah pawh hliam an awm rin a ni bawk. Nyasa khua hi Nagaland leh Arunachal Pradesh state inrina bul, Mon district-a awm a ni.

Kum 2015 khan sorkar laipui chuan Manipur-a army convoy an ambush avangin NSCN-KYA hi Unlawful Activities (Prevention)Act hnuaiah firfiak pawlah a lo puang tawh a ni.

Nimin chawhma dar 11.30 vel khan Myanmar lam aṭangin hel nia hriatten van lamah silai ṭum eng emaw zat an kap puak bawk.