Guwahati-ah lockdown kar hnih chhung thlahdul dawn

Assam sorkarin Guwahati khawpuia hri darh tur venna atana lockdown a puan chu nimin zing aṭang khan kar hnih chhung, August 2 thleng atan a thlahdul. 

Chief secretary Kumar Sanjay Krishan chuan June 19-August 2 thleng Kamrup (Metro) district huam chhungah dawr leh sumdawnna hmun dangte hawn phal a ni ang a, mahse a in chhawkin an hawng ang. Wholeseller-te pawh Thawhṭanni aṭanga Zirtawpni thleng inhawn phalsak niin; thlai, sa leh sangha zuarte pawh inhawn phalsak an ni bawk. 

Courier leh e-commerce service pawh Thawhṭanni-Zirtawpni, zing dar 7-tlai dar 5 inkar an thawh phalsak a ni a, in sakna leh industry lamah pawh Covid-19 protocol zawm chunga hna an thawh chhun­zawm phalsak an ni bawk.

Khuahkhirhna thlahdul ṭhen mah se, Guwahati city leh Kamrup (Metro) district-ah erawh kartawp apiangin total lockdown kalpui a ni thung ang. 

Khawpui chhung bika khuahkhirhna thlahdul ṭhen ni mah se, state sorkar chuan July 22 aṭangin state chhunga district inkalpawhna erawh a khap rih dawn a ni. 

Kamrup district-a Covid Care Centre-a hri kai enkawl mek 100 vel chu kar liam ta Ningani zan khan tlanchhuakin, national highway 31 an dang. Covid-19 kai tlanchhuakte hian CCC ah enkawlna an pe ṭha lo a, ei tur leh tui in tur pawh an pe mumal lo niin an sawi. Mahse Kamrup (Rural) Deputy Commissioner (DC) Kailash Kartik-a'n an harsatna neih chinfel dan ngaihtuah sak a tiam a, an awmna hmuna kir leh tur a ngen  hnuah centre lamah an kir leh ta a ni. 

Health minister Himanta Biswa Sarma chuan CCC-a enkawlna an duhthu a sam lo anih chuan hri kaite chuan home quarantine turin an dil thei ang, tih a sawi. Minister chuan, "Enkawl dam an nih a, midangte an kai chhawn lohna turin centre-ah kan dah a ni. An lungawi lo a nih chuan, in lama inkhung hrang turin sorkarin dan a ziamte zawm tura intiamin an haw thei reng a ni," a ti. Health worker-te chu hri kaite enkawlin chhun leh zanin an thawk a, hna an ngah avangin ṭhenkhat lo tihkhawtlai tawkte pawh a awm a ni thei tiin minister chuan a sawi. 

Assam-a Covid-19 kai hmuh chhuah tawh hi mi 22,981 an tling tawh. Nimin khan hri kai hmuh chhuah thar hi mi 1,117 an awm a, an zingah mi 515 hi Guwahati khawpui bika mi an ni. Hri kai hmuh tawh zingah mi 15,165 chu enkawl dam an ni tawh a, hri kai mek hi mi 7,760 an la awm. Assam-a Covid-19 vanga thi hi mi 53 an awm tawh bawk a ni.