Kaziranga Park-ah tuilian vangin Ramsa 100 chuang an thi

Assam state-a tuilian vangin Kaziranga National Park and Tiger Reserve (KNPTR) huam chhunga ramsa 108 an thi tawh a, an zingah hian samak ki khat nei chi pakua an tel.

Park chhunga tuilian avangin ramsa tam tak chu park kaltlang, natio­nal highway-ah an chhuak a, heng ramsate hi chhanchhuah leh hmun him lama hruai hna hi ngawrh taka thawh mek a ni. Nimina KNPTR bulletin tihchhuahah, Park huam chhunga hmun 85% vel chu tuilian hi chimin, a chim zau zawng hi sq km 430 chuang a ni. Park chhunga forest camp 223 zinga 43 chu tuiin a chim a, camp paruk pawh awmzui ngam lohin an chhuahsan tawh.

Official-te chuan nimin thleng khan ramsa 134 an chhanchhuak tawh a, tuilian vanga hliam tuar leh motor-in a sut 51 te enkawl mek an ni bawk a ni. 

Khawvela samak ki pakhat nei chi awm tamna ber, Kaziranga Park hian kumtinin tuilian hi a tuar ziah a ni. He park-ah hian samak 2,400 leh sakei 121 vel an awm. Nikum khan tuilian vangin park-a ramsa 200 dawn an thi a, an zingah hian samak 18 an tel a ni. 

Ruah la sur chhun­zawm zel avangin Assam tuilian chuan ziaawm lam a la pan thei lo a, tuilian vang leh tuilianin chhiatna a thlena vanga thi hi mi 79 an tling tawh. Tuilian  hian state chhung district 28-a cheng, mi nuai 40 chuangin an tuar mek a ni. Tuilian tuarte awmna turin sorkar chuan relief camp 711 a siam tawh a, heng hmunah hian mi 51,421 an khawsa mek a ni.