District ṭhiah a ni lo : Manipur CM

Manipur Chief Minister N. Biren Singh chuan state sorkarin district pariat a hlankai thar te chu United Naga Council (UNC)-te'n ṭhiat leh turin nawr mah se ṭhiah a ni tawh dawn lo tih Pathianni khan a sawi.

Manipur-ah hian Okram Ibobi Singh-a kaihhruai Congress sorkar chuan kum 2016 December thla khan district thar pariat a din a, hengte hi Naga-te chuan an dodal nasa hle. Congress sorkar paihthla a, BJP leh an thawhpuiten sorkar thar an din hnuah pawh district chungchanga buaina hi a la reh chuang lo. Chief Minister N. Biren Singh-a kaihhruai sorkar chuan UNC-te hi remna siampui tumin inbiakna a lo neihpui a, inbiakna hi neih leh tura a tih a ni. Hetih rual hian Biren Singh chuan district ṭhiah leh chu thil theih a nih loh thu a sawi ve leh ta a ni. Union Home Ministry, Manipur sorkar leh UNC aiawhte inbiakna neih hun tura ruat July 10 chu sawn a lo ni tawh a, inbiakna neih leh hun tur hi tarlan a la ni lo.