Rajnath Singh-a'n NH-10-ah venhimna khauh zawk pek tiam

11th July, 2017

Union Home Minister Rajnath Singh chuan Sikkim panna kawngpui pawimawh National Highway (NH) 10-ah venhimna khauh zawka kenkawh a nih tur thu Pathianni khan a puang.

Sikkim Chief Minister Pawan Kumar Chamling chuan an chakkhai lamna kawngpui pawimawh NH-10-ah lirthei suasam ṭhin a nih thu HM hnenah hian a thlen a, lirthei veivak te himna ngaihtuahpui turin a ngen a ni. Rajnath chuan Chamling-a ngenna hi tihlawhtlin a tiam a, West Bangal huamchhung Silligur-ah venhimnna khauh zawka kenkawh a nih tur thu a sawi. Sikkim sorkarin West Bangal aṭanga inlakhran duh pawl Gorkha Janmukti Morcha (GJM)-te hmalakna a thlawp thu a puan hnuah Silliguri paltlanga tlan Sikkim lirthei te chuan beih an tawk fo a ni. Lirthei beih tawkte hi Sikkim sorkar hnuaia inziaklutte an ni a, hei hi Darjeeling-a GJM-te hmalakna dodal zawnga chete thil tih a ni.

Sikkim CM Chamling chuan lirthei veivak ten Siliguri-a beih an tawk ṭhin chu pawi a tih thu a lo sawi tawh a, an himna turin hma lak a nih tur thu a lo sawi tawh. NH-10 hi Sikkim tan chuan an kawngpui pawimawh ber a ni a, an bungraw chawkluhna kawngpui ber a ni. Rajnath Singh chuan Sikkim sorkar ngenna hi sorkar laipui chuan a ngai thutak hle a, harsatna lian zawk a thlen lohna turin venhimna khauh zawka kalpui turin ruahmanna siam a ni,a ti. Rajnath Singh hian Union Home Secretary Rajiv Mehrishi chu NH-a lirthei tlante himna tura hma la turin a lo ngen tawh a, hemi chungchangah hian West Bengal sorkar dawr turin a ti bawk.

Sikkim pana tlan lirtheiten beih an tawh fo avang hian lirthei chevel a tlem phah a, hei vang hian nitin mamawh lamkhawmnaah mipuiten harsatna an tawk chho ṭan nia tarlan a ni. Hun rei tak chhung lirthei chevel a buai avang hian Sikkim sorkar chuan cheng vaibelchhe tam tak a hloh tawh nia tarlan a ni a, khualzin tam takin Sikkim an tlawh loh phah a, a awmsa eng emaw zat pawh an tangkhang nia sawi a ni. Chief Minister Pawan Kumar Chamling chuan an harsatna tawh mek chungchangah hian Supreme Court-ah zualko an tum thu a lo sawi tawh bawk.