Assam : Tuilian vanga thi mi 33 tling tawh

Assam-ah tuilian vangin harsatna tawk an pungchho leh mek a, tunhnaiah mi pasarih an thih belh leh a, tuilian leh a kaihhnawiha chhiatna thlenga thi chu mi 33 an tling tawh.

Khawchin hrilh­lawktute chuan Assam, Arunachal leh Sikkim-ahte ruah nasa tak a sur dawn tih an hrilh lawk a, tunkar tir lam khan ruah hi a sur leh avangin tuilian tuar pawh an punbelh leh a ni. Assam State Disaster Management Authority (ASDMA) chuan district 20-a khaw 2,000 vel zet chuan tuilian avang hian harsatna an tawk mek tih an sawi. District hrang hranga tuilian tuar hi mi 12,55,692 an tling tawh a, khaw eng emaw zat chu tuiin a chimpil tawh bawk. Lakhimpur, Darrang, Golaghat, Jorhat, Cachar, Dhemaji, Biswanath, Karimganj, Sonitpur, Majuli, Barpeta, Nagaon, Nalbari, Sivsagar, Morigaon, Chirang, Dibrugarh, Dhubri, Kokrajhar leh South Salmara-te chuan harsatna namen loh an tawk mek a ni. Tuilian tuar hi mi nuai thum velah a tla thla hman a, mahse tun hnaiah ruah a sur leh tak avangin mi nuai 12 an chuang leh tawh a ni. Thlai chinna hmun pawh a chim belh zel a, ram hecter nuai chuang zet a chimpil tawh nia tarlan a ni.

Tun hnaiah tuia tla hlum leh leimin avanga thi mi pasarih an awm belh leh a, an zingah hian naupang pahnih an tel. Nunna chan te hi Jorhat district, Lakhimpur district leh Golaghat district ami te an ni. ASDMA offical-te chuan tuilian hian infrastructure a tichhe nasa hle tih an sawi a, hmun tam takah inkalpawhna kawngpui, chenna-in leh inkalpawhna lei chhia a tam hle tih an sawi. Brahmaputra, Siang, Subansiri, Dhansiri, Jia Bhorali, Puthimari, Beki, Barak leh Kushiara lui-te chuan hmun tam takah hlauhawm chhinchhiahna an pel a, mi tam tak chu hmun him lamah sawn an ni. Thawhṭannni khan district hrang hrangah 148 relief camp siam belh a ni a, heti chung hian chenna-in nei lo chhungkaw 18,000 vel an la awm thu an tarlang.

CM-in chhiat tawkte a tlawh

Assam Chief Minister Sarbananda Sonowal chuan hmun hrang hranga chhiat tawkte a tlawh kual a, Morigaon district-a leimin thlenna hmun pawh a tlawh a ni. Sonowal hi Water Resources Minister Keshab Mahanta bakah, MLA - Ramakanta Deuri, Piyush Hazarika, Principal Secretary to Water Resources Department, Deputy Commissioner leh Morigaon, Superintendent of Police-te chuan a ṭawiawm a ni. Morigaon-a circuit house-ah high-level meeting neih nghal a ni a, harsatna tawk mek te chhanchhuah a, an himna tura hmalak dan turte an rel a ni.

CM Sonowal chuan tuilian leh leimin vanga harsatna tawk te chu a tawrhpui thu sawiin, state sorkar chuan theihtawp chhuahin hma a la zel dawn a ni, a ti. Dpartment hrang hrangte chu hmalakna chak zawka kalpui tura a ngen tawh thu a sawi a, district hrang hranga thuneitute pawh nunna chan an pun belh zel loh nan hma la tura a duh thu a sawi. CM chuan kum tina tuilian avanga harsatna an tawh ṭhin laka invenna tur ngaihtuah a nih thu sawiin, Water Resources Department pawh hma la tura a ngen tawh thu a sawi. Hei bakah hian leimin avanga chhiatna thleng ṭhin chu ven a nih theih nan hma lak a nih tur thu a sawi bawk.

Animal Husbandry and Veterinary Depart­ment leh State Disaster Response Fund (SDRF)-te chu tuilian avanga ramsa thi an punzel lohna tura chak zawka hma la tura hriattir an ni a, ramsa te chu hmun himah sawn tura tih an ni. PHE Deparment pawh mipuiten tui in tur thianghlim an tlakchham loh nana hma la tura ngen an ni bawk.